Orsamentu $616.004 ba VPM pasa, foku ba atrai investidór
DILI, 14 Novembru 2026 (TATOLI)-Parlamentu Nasionál aprova proposta Orsamentu Jerál Estadu (OJE) tinan fiskál 2026 ba Vise-Primeiru-Ministru (VPM) ba Asuntu Ekonómiku ho montante $616.004 iha faze espesialidade ho votu a favór 41, kontra ida no abstensaun 22.
Orsamentu ne’e aloka ba saláriu no vensimentu $262.231, bens no serbisu $292.095, no kapitál menór $61.678.
Vise-Primeiru-Ministru no Ministru Koordenadór ba Asuntu Ekonómiku no Ministru Turizmu Ambiente, Francisco Kalbuadi Lay, hateten proposta OJE 2026 hetan aumenta kompara ho tinan 2025 mak rihun $42.
Nia justifika katak alokasaun ida-ne’e hodi promove Timor-Leste iha nivel rejionál ASEAN no internasionál CPLP hodi aumenta kompetividade, hametin relasaun ekonómika ho nasaun seluk, promove komérsiu no atrai investimentu estranjeiru no emprezáriu lokál.
“Ho orsamentu temi ne’e, hodi fó duni kontribuisaun uitoan ba kreximentu ekonómiku no estabilidade fiskál”, nia hato’o hodi responde ba deputadu sira-nia preokupasaun iha debate proposta OJE 2026 iha Parlamentu,ohin.
PN solisita atu konsentra ba dezenvolvimentu ekonómiku
Iha apresiasaun proposta OJE, deputada CNRT, Cedelízia Faria dos Santos, apresia ba serbisu VPM nian ne’ebé ho papél boot halo koordenasaun ho entidade relevante sira iha área ekonomia.
Mezmu orsamentu ki’ik maibé hala’o atividade barak hamutuk ho Primeiru-Ministru iha rai-laran no rai-li’ur hanesan halo promosaun oioin hodi dada investidór ne’ebé fó impaktu ba ekonomia. “Tanba ita adere ona ba Organizasaun Mundiál Komérsiu, espera serbisu ba oin hala’o di’ak liután”, nia hato’o.
Deputada FRETILIN, Lídia Norberta, sujere atu foku ba pilár ekonómiku, tanba país sai ona membru ASEAN duké halo viajen barak no gasta liu de’it ba serimónia.
Deputadu CNRT, Patrocínio dos Reis Fernandes, apoiu atu organiza fórum ekonómiku, vizita rai-li’ur hodi halo promosaun iha área ekonomia atu hatene pontensialidade país nian hodi dada investidór mai rai-laran.
Deputada PD, Sancha Tilman, sujere katak ho país sai ona membru ASEAN atu fó prioridade ba programa no estratéjia iha planu asaun iha OJE 2026, hodi hetan kreximentu ekonómiku, sosiál no kulturál.
Iha apresiasaun, reprezentante povu sira balun rekomenda atu presta atensaun hodi apoiu setór privadu nasionál atu kompete iha ASEAN, ho kapasitasaun no haree lejizlasaun ba investimentu.
Notísia relevante: Orsamentu ba PN millaun $19.073 pasa, opozisaun vota abstensaun
Jornalista: Nelson de Sousa
Editora: Maria Auxiliadora
