DILI, 14 Novembru 2025 (TATOLI)—Orsamentu Jerál Estadu (OJE) 2026 ne’ebé aloka ba Prezidénsia Konsellu Ministru ho montante millaun $4.928.516 aprovadu iha faze espesialidade ho votu afavór 42 kontra 0 no abstensaun 22.
Totál orsamentu ne’ebé aloka ba Prezidénsia Konsellu Ministru ho montante millaun $4.928.516, kompostu husi programa rua hanesan funsionamentu no dezenvolvimentu institusionál no ida seluk mak polítika estratéjika nasionál no fahe ba sub-programa neen no atividade hamutuk 25.
Programa dahuluk nian kona-ba funsionamentu no dezenvolvimentu institusionál, fahe ba kategória saláriu vensimentu millaun $1.547.345, bens servisu millaun $1.238.258, kapitál menor rihun $50.000 ho totál hamutuk millaun $2.835.603.
Enkuantu iha programa daruak nian ba implementasaun 2026 kona-ba polítika estratéjika nasionál hamutuk millaun $2.092.913, ne’ebé kompostu husi saláriu vensimentu hamutuk miliaun $1.560.958 no bens servisu ho montante $531.955.
Durante diskusaun proponente opozisaun sira mós propoin proposta lima maibé proposta haat mak retira no ida seluk la pasa iha prosesu votasaun.
Jornalista : Alexandra da Costa
Editór : Cancio Ximenes
