Parlamentu aprova SEKOMS nia orsamentu hamutuk millaun $5.6
DILI, 14 Novembru 2025 (TATOLI)-Parlamentu Nasionál (PN) aprova proposta Orsamentu Jerál Estadu (OJE) 2026 ba Sekretaria Estadu Komunikasaun Sosiál (SEKOMS) ho montante $5.594.454 iha faze espesialidade ho votu a favór 42, kontra 0 no abstensaun 20.
Verba ne’e aloka ba saláriu no vensimentu $1.192.138, bens no serbisu $775.876, transferénsia públika $2.951.440, no kapitál dezenvolvimentu rihun $675.
Tuir Livru OJE 2026, SEKOMS iha Programa Funsionamentu no Dezenvolvimentu Instituisionál ho subprograma ida no atividade hitu.
Programa Dezenvolvimentu Setór Komunikasaun Sosiál ho subprograma haat; dezenvolve mekanizmu lejizlasaun, regulamentasaun no regulasaun, diversifika no fortalese meiu komunikasaun, kapasitasaun jornalista no fortalesimentu koezaun sosiál, superintendénsia no tutela órgaun komunikasaun sosiál Estadu ho ninia atividade 13.
Programa Dezenvolve Sistema Komunikasaun Institusionál ho subprograma rua; diseminasaun informasaun ba públiku, dezenvolvimentu sistema komunikasaun interna Governu ho atividade neen.
Liuhusi diskusaun espesialidade, deputadu CNRT no PD aprezenta proposta ida hodi hasai $382.500 iha Dotasaun Jerál Estadu iha Programa Inkluzaun Sosiál no realoka ba SEKOMS nia Programa Dezenvolvimentu Setór Komunikasaun Sosiál iha atividade instala rede televizaun dijitál terrestre.
Notísia relevante: Proposta adisonál orsamentu $382.500 ba SEKOMS pasa
Jornalista: Nelson de Sousa
Editora: Maria Auxiliadora
