PN aprova OJE 2026 ba Vise PM asuntu sosiál hamutuk $976.696
DILI, 14 Novembru 2025 (TATOLI)—Parlamentu Nasionál (PN) aprova Orsamentu Jerál Estadu (OJE) 2026 ba Gabinete Vise-Primeiru-Minisru, Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária hamutuk $976.696 ho votu afavór 41, kontra 0 no abstensaun 23.
Totál Orsamentu Jerál Estadu (OJE) 2026 ho montante $976.696 ne’e fahe ba kategoria saláriu bens servisu $384.601, bens servisu $492.095 no kapitál menór ho montante $100.000, tanba ne’e Gabinete Vise-Primeiru-Ministru Asuntu Sosiál kontinua esforsu hodi halo koordenasaun ho parséria relevante sira atu eleva seguransa alimentár hodi kombate stunting (mánutrisaun) ba labarik sira iha Timor laran tomak.
“Esforsu ne’ebé mak daudaun ne’e ita halo mak oinsá halo levantamentu dadus ba moras stunting nian, hodi kombate nafatin moras ida-ne’e. Maske antes ne’e persentajen ba moras stunting nian sa’e 47% maibé agora redús ba 45%, signifika esforsu ne’ebé ita halo iha mudansa, maibé sira sei nafatin tau atensaun ba asuntu ida-ne’e,” Vise-Primeiru-Minisru, Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária. Mariano Sabino Assanami relata iha debate OJE 2026 iha faze espesialidade ba loron daruak iha PN, ohin.
Tamba ne’e, nia dehan, formasaun ba labarik sira labele fraku tanba bainhira fraku sei fó impaktu ba kapasidade labarik nian atu aprende di’ak liután, tanba ho imunidade ne’ebé mak fraku laiha vontade ba sira atu aprende ho di’ak.
Nia dehan, Governu nafatin koordena ho parséria nasionál no internasionál atu halo mós levantamentu ba dadus produtu alimentár hodi indiika poténsia ne’ebé iha atu fó hahan ne’ebé nutritivu ba labarik sira, atu redús konsumu hahan importasaun (makanan instan).
“Hanesan ita hotu hatene katak stunting ka raes badak la’ós impaktu de’it husi hahan maibé bele mós liuhusi bee. Bainhira bee ne’ebé laiha ijiéne sei fó impaktu moras stunting ba labarik sira, tanba ne’e mak daudaun ne’e ita halo hela koordenasaun ho parte relevante sira atu haree kona-ba seguransa alimentár,” nia informa.
Jornalista : Alexandra da Costa
Editór : Cancio Ximenes
