DILI, 14 Novembru 2025 (TATOLI)—Parlamentu Nasional (PN) aprova Orsamentu Jerál Estadu (OJE) 2026 ne’ebé aloka ba Sekretária Estadu Formasaun Profisionál no Empregu (SEFOPE) ho montante $9.689.238 ho votu a-favór 41, kontra 0 no abstensaun 23.
Orsamentu ho montante refere kompostu husi proposta orsamentu inisial $9.489.238 (millaun $9-resin) no aumenta husi proposta alterasaun proposta ho montante $6.441.312 (millaun $6-resin) hodi aloka $200.000 ba programa investimentu no diversifikasaun ekonómia.
Totál inisiál Orsamentu Jerál Estadu (OJE) 2026 ho montante $9.489.238 kompostu husi saláriu no vensimentu $3.414.00 (millaun $3-resin), bens servisu $4.637.804 (millaun $4-resin), transferénsia públika $947.959 (rihun $947-resin) no kapitál dezenvolvimentu hamutuk $489.475 (rihun $489-resin), ne’ebé fahe ba programa prioridade haat, sub-programa 11 no atividade 44.
PN solisita SEFOPE tenke transparánsia ba prosesu rekrutamentu empregu seasonál
Deputadu FRETILIN, Antoninho Biaco, hateten ho orsamentu ne’ebé mak sae iha tinan ida-ne’e, entaun ami husu ba SEFOPE atu halo transparánsia ba sistema rekrutamentu traballadór seasonál nian, atu fó biban ba ema hotu lalika hili-hili liuliu iha munisípiu sira-ne’ebé durante ne’e balansu laiha karik bele tama hotu.
Asuntu ne’e pertenente, nune’e nia anúnsia proposta ida-ne’e reprezenta ba timoroan sira hotu, atu hotu-hotu bele asesu ba empregu iha rai-li’ur no sentru formasaun sira mós tenke kapasita kapasidade rekursu umanu ho di’ak atu bainhira sira lahetan oportunidade ba servisu iha rai-li’ur maibé bele mós enkaixa sira ba iha empreza internasionál sira.
“Entaun, ita produs ema bele servisu iha rai-laran no balun mós bele ba iha rai-li’ur, hodi halo investimentu ekonómia ba sira-nia moris no família,” nia hateten.
Sekretáriu Estadu Formasaun Profisionál no Empregu, Rogério Araújo Mendonça, hateten orsamentu ne’ebé Governu aloka ba sira iha tinan ida-ne’e la’ós sa’e maka’as, tanba alokasaun orsamentu ne’e mai husi programa formasaun empregu ne’ebé antes ne’e jere husi FDCH, maibé agora fó fali sira hodi implementa, tamba ne’e mak osan sira-ne’e aloka aumenta tan ba sira.
“Signifika orsamentu ne’ebé iha la’ós de’it hala’o funsionamentu iha interna instituisaun nian, maibé sira mós iha polítika hodi kria empregu temporária ba komunidade sira iha área rurál hanesan, hamoos sedimentasaun iha drainajen, hadi’a estrada rurál ne’ebé sei halo pagamentu ba kada loron, entaun ida-ne’e mós bele sirkula ekonómia iha área rural,” nia dehan.
Enkuantu durante diskusaun iha mós alterasaun proposta rua husi proponente Governu no opozisaun nian, hanesan proposta nú. 27 no nú. 45, ho justifikasaun atu hamosu empregu imediatamente liuliu ba grupu foinsa’e no vulneravel sira iha área rurál, maibé proposta nú. 45 retira diretamente husi proponente opozisaun no proposta nú. 27 pasa ho votu afavór 41, kontra 0 no abstensaun 25.
Jornalista : Alexandra da Costa
Editór : Cancio Ximenes
