Gana manán Panama 1-0 iha Kopa Munidál 2026
DILI, 18 Juñu 2026 (TATOLI)—Gana manán dramátiku 1-0 kontra Panama iha jogu faze Grupu L Kopa Munidál 2026. Vitória ba ekipa The Black Stars ne’e marka husi jogadór Caleb Yirenkyi iha jogu ne’e nia rohan.
Jogadór médiu Selesaun Nasionál Gana, Caleb Yirenkyi sai eroi bainhira hadau pontu tolu husi adversáriu Panama bainhira jogu sei empata 0-0, iha jogu ne’ebé realiza iha Estádiu Tronto, Amérika, kinta dadeer ne’e.
Golu ne’ebé Caleb Yirenkyi marka ne’e, lori Gana rekolla pontu tolu iha faze Grupu L hodi okupa iha pozisaun daruak, pozisaun primeiru Inglatera ho pontu tolu maibé diferente golu. Enkuantu Kroasia no Panama iha faze ikus liu tanba seidauk rekolla pontu.
Bainhira jogu hahú, Panamá iha ameasa rua iha minutu lima primeira parte jogu nian. Avansadu panama nian, Cecilio Waterman nia suta ba baliza hetan blokeiu husi defeza ganés no la konsege golu.
Liutiha minutu tolu, médiu panameense Cesar Blackman hetan oportunidade. Blackman lansa suta ida ho ain-loos maibé bola ne’e salva husi defeza ganés nian.
Hafoin ne’e, jogu daruak haree oportunidade uitoan de’it mak kria, maske intensidade aas nafatin. Ekipa rua troka atake, maibé laiha ekipa ida mak bele ameasa ida seluk nia baliza.
Situasaun ida-ne’e kontinua to’o primeira parte ramata. Defeza Gana nian Jerome Opoku, ne’ebé mak hakat ba oin hodi hamutuk jogadór seluk halo atake, tenta atu ameasa maibé la hetan dalan no blokeia metin husi defeza panameza iha minutu 33.
Jogu kontinua la’o ho intensidade aas, mosu tan ameasa foun ida iha minutu 36. Defeza panama nian, Jiovany Ramos lansa suta ida ba dala uluk hosi kaixa penalti nia laran, maibé ida-ne’e liu trave Gana nian, la rezulta golu.
Guarda-rede Gana nian, Lawrence Ati Zigi, okupadu tebes iha primeira parte, sai beibeik husi nia área hodi hadook jogadór panamenu sira.
Gana hatán ba presaun Panama nian iha minutu 45. Ernest Nuamah nia suta espekulativu sai dook hosi poste liman-loos. Nune’e to’o jogu primeira parte termina rezultadu hela ho 0-0.
Panamá kria ameasa rua iha minutu lima dahuluk jogu nian. Avansadu panameense Cecilio Waterman nia suta ba baliza hetan blokeiu husi defeza ganés iha minutu daruak.
Dolar ba segunda parte, Panama hetan oportunidade osan-mean iha minutu 60. Cristian Martinez iha pozisaun konfortavel iha kaixa penalidade, maibé nia suta la’o dook husi parte karuk baliza Gana nian.
Gana iha nia oportunidade di’ak liu iha minutu 65. Kruzamentu husi parte loos hetan husi jogadór Jordan Ayew iha baliza nia oin, maibé defeza Panama nian lalais liu hodi hadau bola hodi rezulta kantu, maibé kantu ne’e la fó impaktu.
Liutiha minutu neen, Antoine Semenyo hetan oportunidade. Maski nune’e, jogadór Manchester City ne’e, lansa suta ho ain-loos atu tama ba rede Panama maibé salva husi guarda-rede panameense Benjamin Asare.
Jogu kontinua la’o to’o minutu 90, laiha golu, aumenta tan adisionál minutu 10, iha ne’ebá foin hetan oportunidade halo golu liuhusi jogadór mediu Caleb Yirenkyi iha minutu 90+5 hodi habahat kedas Gana nia vitória.
Gana (4-2-3-1):
Lawrence Ati Zigi; Jonas Adjetey, Jerome Opoku, Marvin Senaya, Gideon Mensah; Caleb Yirenkyi, Elisha Owusu; Antoine Semenyo, Ernest Nuamah, Kamaldeen Sulemana; Jordan Ayew.
Panama (3-4-3):
Orlando Mosquera; Cesar Blackman, Jose Cordoba, Jiovany Ramos; Amir Murillo, Carlos Harvey, Cristian Martinez, Andres Andrade; Jose Luis Rodriguez, Edgar Yoel Barcenas, Cecilio Waterman.
Jornalista : Hortêncio Sanchez
Editór : Cancio Ximenes
