KOVALIMA, 14 Novembru 2025 (TATOLI)- Ofisiál programa Pradet Kovalima, Anito Gusmão de Araujo relata, hahú Jullu to’o Novembru ne’e, pradet Kovalima rejista ona kazu 16, husi postu administrativu Maucatar no Suai, Munisípiu Kovalima.
“Kazu sira ne’ebé ami rejista bainhira simu husi ami-nia parseiru hamutuk 16 ho tipu kazu sira hanesan la’os ho forma violénsia doméstika ho forma liu violénsia fiziku, abuzu seksuál ba menór no kazu insestu”, dehan Anito Gusmão ba TATOLI iha AMC ohin.
Pradet Kovalima rejista kazu 16 ne’e mai husi postu administrativu Maucatar 10 no postu administrativu Suai neen ho tipu kazu la’os violénsia Doméstika rua, violénsia doméstika ho forma liu hitu, violénsia fiziku ida, abuzu seksuál ba minór lima no kazu insestu ida.
Pradet rejista kazu sira ne’e bainhira simu husi parseiru sira hanesan,unidade ema vulneravél (PNTL-VPU) Kovalima, Alfela, família, husi eskuadra PNTL postu administrativu Suai no mós husi kliente rasik.
Hafoin sumi vítima sira pradet kontinua halo ezaminasaun médiku forensik, akonselamentu, akomodasaun hodi reintrega ba família no mós kontinua followup ba vítima sira.
Aleinde simu vítima ba kazu sira fatin hakmatek Kovalima mós hala’o atividade sira seluk hanesan ,apoiu ba vítima vulneravél liuhosi programa sosiál ne’ebé nia benefisiáriu hamutuk 88 mai husi munisípiu hanesan, Ainaro ,Manu Fahi no Kovalima
Prosesu atu fó apoiu ba vítima liuhosi faze selesaun hodi halo identifikasaun asesmentu, prioridade, hala’o enkontru, formasaun distribuisaun materiál ba benefisiáriu sira halo negósiku ki’ik hanesan faan obralan no mós mina. Atividade fó apoia ba benefisiáriu sira hodi loke negósiu ki’ik nune’e bele sustenta sira nia moris ba loro-loron ni’an.
Jornalista: Celestina Teles
Editór : Florencio Miranda Ximenes
