DILI, 14 Novembru 2025 (TATOLI) – Prezidente Ferdinand R. Marcos Jr., iha loron-sesta ne’e, kompromete atu tulun Timor-Leste, membru foun liuhosi Asosiasaun Nasaun Sudeste Aziátiku (ASEAN, sigla inglés), hodi halo bloku rejionál ne’e sai forte no reziliente liután.
Prezidente Ferdinand R. Marcos Jr, halo promesa ne’e liuhusi Enkontru Ministru Direitu ASEAN (ALAWMM, sigla inglés) ba da-13 iha Manila, Grand Hyatt iha Sidade Taguig.
Marcos subliña papél ativu Filipina nian hodi harii komunidade ASEAN unifikadu ida ne’ebé bazeia ba prinsípiu sira justisa nian, konfiansa mútua, no estadu direitu.
“Filipina reafirma ninia kompromisu atu serbisu hamutuk ho Estadu-membru hotu-hotu ba ASEAN ida ne’ebé forte no reziliente liu. Ami mós hein atu habelar apoiu ne’e ba ita-nia parseiru foun liu, Timor-Leste, no prontu atu tulun sira bainhira sira prepara atu adere ba ita-nia órgaun legál sira,” Marcos hateten.
“Loos duni, ASEAN forte de’it hanesan envolvimentu hosi membru idak-idak, estadu membru ida-idak, no ami valoriza lian ida-idak iha meza,” nia hatutan.
Timor-Leste foin hahuluk partisipa iha ALAWMM dezde sai membru plenu ba ASEAN, ne’ebé reprezenta husi Ministru Justisa, Sérgio Hornai.
ALAWMM harii iha tinan 1986, serve hanesan fórum prinsipál ba diálogu no kooperasaun entre ministru justisa, prokuradór jerál, no sekretáriu justisa sira hosi estadu membru sira ASEAN nian. Reuniaun ne’e konvoka kada tinan rua, nia hala’o papél sentrál ida hodi haburas kolaborasaun no lansa inisiativa foun sira entre instituisaun legál sira ASEAN nian, hanesan hametin kapasidade rejiaun nian ba prevensaun krime no justisa kriminál, no esplora armonizasaun lei komérsiu ASEAN nian.
Fonte: PNA
