RENETIL propoin ba Xefe Estadu kondekora membru na’in-12
DILI, 14 Novembru 2025 (TATOLI)– Sekretáriu Jerál RENETIL, Joaquim da Fonseca, propoin ba Prezidente Repúblika, José Ramos-Horta, atu kondekora membru na’in-12 ne’ebé fó ona sira-nia vida ba luta libertasaun nasionál.
Nia dehan, enkontru ne’e hato’o formalmente proposta ida atu Estadu fó kondekorasaun ho títulu póstumu ba membru na’in-12 husi organizasaun rezisténsia estudante nian ne’ebé fó sira-nia vida durante luta ba libertasaun nasionál.
“Proposta ne’e hato’o atu fó onra ba membru na’in-rua (2) ne’ebé mate iha 1997 hafoin sira-nia partisipasaun iha okupasaun embaixada Áustria nian iha Jakarta, no mós membru na’in-10 seluk ne’ebé lakon sira-nia vida iha munisípiu oioin durante períodu krítiku Konsulta Populár 1999 nian,” Joaquim hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Ho proposta ne’e, Prezidente Ramos-Horta espresa ninia apoiu ba inisiativa ne’e no fó instrusaun ba ekipa jurídika Prezidénsia nian atu hahú prosesu verifikasaun ba kondisaun nesesária hotu-hotu atu atribui onra sira-ne’e.
Ho desizaun ida-ne’e, Prezidente afirma fila-fali ninia kompromisu atu prezerva memória istórika no rekoñese kontribuisaun valioza hosi erói hotu-hotu ne’ebé luta independénsia no dignidade Timor-Leste nian.
Prezidénsia Repúblika sei foti medida administrativa ne’ebé presiza, ho objetivu atu hala’o serimónia formál kondekorasaun nian iha loron 27 fulan-Novembru atu onra ho dignu sakrifísiu husi patriota joven sira-ne’e no fó rekoñesimentu ba sira-nia família.
Jornalista : Hortencio Sanchez
Editór : Cancio Ximenes
