Tékniku veterinária vasina anti rabies ba asu 1.927 iha Kovalima
KOVALIMA, 14 Novembru 2025 (TATOLI)- Servisu munisípiu Agrikultura Kovalima liuhusi tékniku veretinária vasina ona animál doméstika hanesan asu hamutuk 1.927, iha munisípiu Kovalima.
Animál hanesan asu hamutuk 1.927 ne’e tékniku sira foin maka kobre iha postu administrativu Fatululik, Maucatar, Tilomar no Suai, maibé postu administrativu sira seluk seidauk konsege kobre.
“Durante tekniku sira vasina asu iha postu administrativu haat konsege vasina ona anti rabies ba asu hamutuk 1.927 husi númeru ne’e liuhusi teste asu 15 maka pozitivu moras rabies” , Diretór Servisu Munisípiu Agrikultura Kovalima Lino Magno, relata ba Tatoli iha Kovalima ohin.
Tuir dadus 1.927 tékniku sira hala’o vasina asu tama sai uma iha postu Maucatar mak asu hamutuk 247 husi númeru ne’e vasina ona asu 103 seidauk vasina 144. postu Suai mak asu hamutuk 988, vasina ona 405 seidauk vasina 583.
Iha postu administrativu Tilomar asu hamutuk 343, asu ne’ebé vasina ona 132, seidauk vasina 211. Iha Fatululik asu hamutuk 353 kompostu asu ne’ebé vasina ona 106, seidauk vasina hamutuk asu 247 .
Stock vasina iha armajen servisu munisípiu hamutuk 750 cc tanba uza vasina 746 cc husi totál vasina rihun 15 ne’ebé haruka mai husi diresaun nasionál veterinária atu vasina antí rabies ba asu.
Tuir dadus ne’ebé fó sai husi Ministériu saúde (MS) sidadaun ne’ebé hetan asu tata hamutuk rihun 4-resin. Husi númeru ne’e sidadaun ne’ebé lakon vida , tanba moras rabies hamutuk na’in-22 .
Aleinde ne’e dadus husi Servisu saúde munisípiu Kovalima fó sai husi Diretór saúde Kovalima Domingos Sequeira informa katak, sidadaun husi munisípiu Kovalima ne’ebé hetan asu tata hamutuk 611 husi númeru sidadaun ne’ebé lakon vida tanba moras raiva hamutuk hitu.
Jornalista: Celestina Teles
Editór : Florencio Miranda Ximenes
