DILI, 15 Novembru 2025 (TATOLI)—Feto emprezária kuaze 100 hosi munisípiu oioin kompete Prémiu Feto iha Negósiu 2025. Hosi númeru ne’e, iha na’in-sia sai vensedora.
Prémiu ne’e hanesan kolaborasaun ida entre Koorporasaun Finansa Internasionál (IFC)—membru ida hosi Grupu Banku Mundiál ne’ebé fó apoiu ba setór privadu no Associação Empresarial das Mulheres de Timor-Leste (AEMTL).
Eventu ne’e halo-parte iha Programa Dezenvolvimentu Abilidade Setór Finanseiru, inisiativa konjunta husi IFC no Banco Central de Timor-Leste (BCTL), ho apoiu husi Governu Austrália no Nova Zelándia, ho objetivu atu habelar inkluzaun finanseira iha país.
Sekretária Estadu Igualdade (SEI), Elvina Sousa Carvalho, hein katak prémiu ne’e bele hasa’e vizibilidade no rede emprezariál feto emprezária sira-nian, nune’e mós habelar sira-nia asesu ba rekursu sira-ne’ebé fó apoiu ba kreximentu emprezariál.
“Kalan ne’e ita selebra feto sira-nia esforsu atu partisipa liután iha dezenvolvimentu, no ita hein katak prémiu ida-ne’e bele sai hanesan plataforma ida ba feto sira atu motiva malu,” nia hateten liuhusi nia diskursu iha Bebora, Sesta (14/11).
Iha fatin hanesan, Prezidente AEMTL, Hergui Luina Fernandes Alves, apresia ba partisipante sira hotu, hodi nota katak kuaze feto na’in-100 hosi nasaun hotu ne’ebé hatama nomeasaun, ne’ebé reflete nivel interese no partisipasaun ne’ebé aas.
“Serimónia ne’e fó onra ba vensedór na’in-neen hosi kategoria oioin, reprezenta setór oioin, hosi retallu ho agrikultura to’o ospitalidade no finansa. Saida maka ami haree iha kalan ne’e maka kbiit hosi feto sira-ne’ebé apoia malu. Feto idak-idak ne’ebé marka prezensa, maski sira manán ka la’e, harii negósiu sira-ne’ebé forte liu no inspira jerasaun tuirmai hosi líder sira iha Timor-Leste,” nia esplika.
Nune’e mós, Reprezentante IFC, Amina Coulibaly esplika katak prémiu ba feto sira iha negósiu ho objetivu atu destaka kontribuisaun sira hosi feto emprezária sira, habelar sira-nia lian no liga ho oportunidade sira rede nian ne’ebé bele hasa’e liután sira-nia kreximentu negósiu nian.
“Investe iha feto sira maka investimentu matenek liu, ne’ebé maka nasaun ida bele halo,” nia subliña.
Manan-na’in sira prémiu tinan ida-ne’e maihosi kategoria oioin, hosi organizasaun sira empoderamentu ekonómiku feto nian, na’in ba negósiu sira-ne’ebé estabelese ona to’o líder sira hosi setór koorporativu no finanseiru. Sira reprezenta rejiaun oioin, inklui Dili, Suai, Baukau, no Ainaru.
Destinatáriu sira hosi Prémiu Feto iha Negósiu 2025 nian hatudu diversidade hosi feto sira-nia kontribuisaun hodi dudu kreximentu ekonómiku no dezenvolvimentu sosiál iha Timor-Leste. Ajénsia Empregu Konnekto husi Dili manán prémiu ba inisiativa di’ak liu iha empoderamentu ekonómiku feto liuhosi fornesimentu empregu ne’ebé estavel, formasaun profisionál no oportunidade dezenvolvimentu karreira, inklui iha setór sira-ne’ebé domina husi mane.
Prémiu ba inisiativa di’akliu iha apoiu ba kreximentu negósiu feto nian ba Programa Empoderamentu Ekonómiku Feto Heineken, ne’ebé fornese forma oioin apoiu nian hahú hosi literásia finanseira no mentorizasaun to’o marketing kriativu no habelar asesu ba merkadu.
Iha kategoria na’in ba negósiu ne’ebé estabelese di’ak liu iha Dili, Zeferina Marta Alves, fundadora Single Origin Coffee, hetan rekoñesimentu ba nia susesu hodi habelar nia negósiu, hasa’e inovasaun iha servisu fatin, no hakbiit funsionáriu sira no agrikultór lokál sira liuhosi formasaun no mentorizasaun.
Entretantu, Fundadora Timor Getaway, Flora Fidencia Brytes Ximenes, simu prémiu ba fundadór Startup di’ak liu iha Dili tanba nia inovasaun dijitál iha setór turizmu, liga turista sira ho negósiu feto no komunidade rurál sira.
Junita de Araújo, husi Suai hetan nomeasaun nu’udár na’in ba negósiu ne’ebé estabelese di’akliu tanba ninia susesu hodi dezenvolve Pedrojunidar Unipessoal, Lda, ne’ebé liuhosi estratéjia diversifikasaun produtu no aproveita mídia sosiál.
Iha kategoria Start-up munisípiu nian, Natália de Almeida da Silva husi Ainaro manán prémiu ne’e tanba ho susesu haburas Quin Café & Resto ba negósiu kulinária no restaurasaun ne’ebé emprega juventude lokál no enkoraja diversifikasaun ekonómika.
Prémiu Lider Korporativu Feto Di’ak Liu fó ba Ana Paula da Costa Xavier, CEO Similie nian, ba nia lideransa iha avansu inovasaun iha setór teknolojia ne’ebé domina hosi mane sira.
Leopoldina Joana Guterres, husi Baukau hetan rekoñesimentu nu’udár modelu kareira nian.
Jornalista: Osória Marques
Editór: Xisto Freitas da Piedade
