DILI, 15 Novembru 2025 (TATOLI)–Ekipa Maudoko Football Club iha ambisaun gaña pontu tolu iha kada jogu primeira divizaun tanba mehi hakarak sai kampiaun iha Liga Futeból Femininu Timor-Leste (LFFTL).
Treinadór Maudoko FC, Zeca Sarmento, esplika klube hotu-hotu hakarak manán iha jogu inkluidu Maudoko FC tanba mehi sai kampiaun LFFTL, importante bá-oin kontinua hadi’a liña jogadora nune’e bele atinje meta iha époka 2025-2026.
“Ami hakarak jogu tuirmai kontinua hetan pontu tolu. Ami-nia alvu hakarak sai kampiaun maibé buat hotu la fásil. Importante ami nafatin haka’as aan atu ami-nia mehi bele sai realidade ,” Treinadór Maudoko FC informa ba TATOLI iha Estádiu Munisipál Dili, Sábadu ne’e.
Zeca relata atu atinje mehi nia parte sei hadi’a liuliu liña defeza hafoin jogadora Noémia iha faze rekuperasaun tanba adversária enxe golu hodi fó impaktu ba produtividade golu.
Aleinde ne’e, ho prezensa jogadora estranjeira na’in-haat husi Indonézia hanesan rua husi Java no Papua kompostu husi Defi no Ina iha liña média, Feni iha área estrema eskerda no avansada Anisia ne’ebé ajuda hodi eleva Maudoko iha LFFTL.
Entretantu, Maudoko FC okupa iha pozisaun daruak ho pontu sanulu (10), rezultadu jogu haat hanesan manán tolu (3) no derrota ida (1).
Jornalista: Natalino Belo
Editór: Xisto Freitas da Piedade
