DILI, 15 Novembru 2025 (TATOLI)–Sekretáriu Estadu Arte no Kultura (SEAK), Jorge Soares Critovão, introdús preparasaun ekipa Timor-Leste nian ne’ebé sei bá partisipa esposizaun daruak iha Venice Biennale, Itália, Maiu 2026, ba Primeru-Ministru (PM), Kay Rala Xanana Gusmão.
“Ita atu hili halo abertura esposizaun maibé ita seidauk deside data, tanba sei iha faze koordenasaun, ne’ebé sei deside iha tinan oin, fulan-Janeiru nia rohan ka inísiu Fevereiru,” nia informa bainhira halo sorumutuk ho PM Kay Rala Xanana Gusmão, iha Palásiu Governu, Sábadu ne’e.
Nia dehan partisipa espozisaun ne’e joven timoroan ne’ebé ho talentozu sira hodi marka partisipasaun dahuluk Timor-Leste nian iha eventu globál ba arte kontemporánea boot-liu iha mundu.
“SEAK introdús mós Loredana Pazzini-Paracciani nu’udár Kuradora Pavilion Timor-Leste nian ba espozisaun Venice Biennale ho nia servisu maka halo selesaun no prepara artista timoroan sira-ne’ebé bele reprezenta Timor-Leste iha espozisaun ne’e,” nia dehan.
Notísia relevante: Governu sei aprezenta Tais Don ba espozisaun iha Venice Biennale 2026
Cristovão hatutan artista na’in-tolu selesionadu liuhosi konkursu públiku ba timoroan sira iha rai-laran no rai-li’ur ne’ebé aplika hamutuk na’in-35 hosi submisaun dokumentu to’o entrevista.
“Oras-ne’e daudaun iha ona artista timoroan talentozu na’in-tolu mak selesionadu atu partisipa iha eventu mundiál ne’e mak hanesan Etson Caminha, Juventino Madeira ho Verónica,” Jorge esplika.
Enkuantu, iha sorumutuk ne’e, Primeiru-Ministru Kay Rala Xanana Gusmão husu atu kontinua prepara didi’ak obra sira-ne’ebé reprezenta identidade Timor nian ho kualidade nune’e ema iha-ne’ebá bele hatene di’akliu Timor-Leste liuhosi arte no kultura.
“Iha Abríl 2024, ita mós partisipa ona iha espozisaun arte internasionál ba da-60 ne’ebé hala’o iha sidade Venice Biennale, Itália ne’ebé partisipa hosi nasaun hamutuk 90,” nia konklui.
Jornalista: Osória Marques
Editór: Xisto Freitas da Piedade
