BOBONARU, 17 Novembru 2025 (TATOLI)-Komunidade no autoridade lokál sira iha munisípiu Bobonaru husu ba Autoridade Inpesaun no Fiskalizasaun ba Atividade Ekonómika, Sanitária no Alimentár (AIFAESA) atu kria ramu ida iha Bobonaru hodi kontrola atividade negósiu.
Abitante Maliana Delfina Maria de Jesus dehan presiza halo inspesaun no fiskalizasaun regularmente tanba dalabarak negosiante no loja-na’in sira kontinua fa’an sasán espiradu.
“AIFAESA halo hela tividade iha munisípiu, maibé seidauk masima tanba sira mai dalaruma fulan tolu hanesan ne’e. Aproveita sira la mai ne’e, ita-nia negosiante sira, liuliu negosiante estranjeiru balu nakar, sira kontinua fa’an sasán expire, balu troka tiha data halo foun fali. Tanba ne’e, ami husu para sira koloka funsionáriu iha ne’e atu loroloron kontrola sasán sira ne’e”, nia hato’o, ohin.
Afonso Lopes, rezidente Batugadé hein katak ho kria ramu AIFAESA ida iha Bobonaro sei hametin fiskalizasaun no garante seguransa ai-han no sasán konsumu nian ba ema hotu-hotu.
“Sasán atu liu prazu ou la’e ne’e sira mak bele deteta. Se sasán liu prazu mak kontinua sirkula iha merkadu bele afeta ba ami-nia saúde, tanba ami laiha koñesimentu. Ami mós agradese tanba AIFAESA agora pasarevista direta iha fronteira ba sasán ne’ebé tama husi Indonézia. Ami husu atividade ne’e atu hala’o kada fulan, tanba pontu entrada mak iha ne’e, se ita deteta entaun labele tama ona ba merkadu”, nia afirma.
Administradór Postu Balibó, Casimiro Soares, mós hato’o preokupasaun kona-ba produtu espiradu ne’ebé sei kontinua fa’an iha merkadu, liuliu iha kioske ki’ik sira.
“Ekipa tenke tun atu halo kontrolu iha loja sira ne’ebé ki’ik, tanba sira-nia sasán ladún folin, bele rai to’o tinan, fa’an fali baratu. Entaun, komunidade balu la hatene, bá hadau. Sira la hatene katak sasán ne’e nia tempu prazu liu tiha ona. Tanba ne’e, AIFASE presiza kontrola nune’e proteze ita-nia komunidade husi buat ne’ebé ita hotu-hotu la hakarak”, nia dehan.
Daudaun ne’e AIFAESA destaka ekipa ida halo atividade iha Rotunda Batugadé hodi halo pasa revista ba kamioneta ne’ebé tula sasán importadu husi Indonézia.
Notisía Relevante: AIFAESA no PNTL inspesiona sasán importadu husi Indonézia iha Batugadé
Jornalista: Sérgio da Cruz
Editora: Maria Auxiliadora
