DILI, 17 Novembru 2025 (TATOLI)—Diretór Nasionál Infraestutura Edukativa, Ministériu Edukasaun (ME), Hélio Lopes informa konstrusaun rezidénsia ba profesór, ME halo konfirmasaun ho Servisu Edukasaun Munisipál sira kona-ba dadus eskola ne’ebé presiza estabelese rezidénsia profesór nian.
“Agora kona-ba identifikasaun no mapeamentu ba eskola sira mak diresaun infraestrutura halo konfirmasaun ho dirijente edukasaun munisipál ne’ebé rekolla dadus kuaze 75% ona. Ha’u fiar katak iha 2027 halo konstrusaun ba rezidénsia profesór ne’ebé hetan kolokasaun profesór bolsa kandidatu sira,” Hélio Lopes dehan ba TATOLI iha nia kna’ar fatin, Vila Verde, Dili, Segunda ne’e.
Nia rekorda katak maski Ministériu Edukasaun la aloka osan ba rezidénsia profesór iha tinan oin maibé Programa Nasionál Dezenvolvimentu Suku (PNDS) kontinua halo konstrusaun rezidénsia ba profesór sira ba eskola ne’ebé presiza duni rezidénsia.
“Maibé ita sei aloka fundu infraestrutura ba eskola CAFE sira-ne’ebé profesór sira presiza tebes rezidénsia. Ita presiza tebes-tebes rezidénsia profesór ba profesór ne’ebé hetan kolokasaun hafoin liuhosi prosesu rekrutamentu bolsa kandidatu,” Lopes dehan.
Dirijente ne’e hatutan posibilidade orsamentu ne’ebé iha sei prioridade ba saladeaula iha tinan oin.
Jornalista: Osória Marques
Editór: Xisto Freitas da Piedade
