DILI, 17 Novembru 2025 (TATOLI)-Ministériu Negósiu Estranjeiru no Kooperasaun (MNEK) sei aproxima ho Governu Indonézia hodi solusiona estensaun vistu ba estudante timoroan sira iha Indonézia.
Ministru Negósiu Estranjeiru no Kooperasaun, Bendito Freitas, dehan asuntu kona-ba vistu, no kitas ba estudante sira ne’e pertinete tebes.
“Ita presiza halo aproximasaun ida nu’udar membru ASEAN nian. Tanba ne’e, ami sei haree karik ida-ne’e sei aplikavel ka la’e? Tanba ita mós parte husi ASEAN hotu, ne’ebé ami ekipa Ministériu Negósiu Estranjeiru no Kooperasaun no Ministériu Interiór ho Serbisu Imigrasaun sei haree kona-ba kestaun ida ne’e atu rezolve’’, ministru hateten hodi responde ba preokupasaun deputadu sira-nia iha ámbitu debate proposta Orsamentu Jerál Estadu (OJE) 2026 iha faze espesialidade iha Parlamentu Nasionál, ohin.
Deputadu Partidu Demokrátiku, Armando Lopes, salienta kestaun referida ne’e foin lalais Komisaun G ba Asuntu Edukasaun, Juventude, Desportu, Kultura no Sidadania hala’o hela fiskalizasaun bá iha Indonézia no estudante hato’o sira-ninia preokupasaun.
Tuir dadus komisaun rejista estudante timoroan rihun 5-resin mak hala’o estudu iha Indonézia iha universidade oioin.
Notísia relevante: https://tatoli.tl/2025/10/08/komisaun-g-husu-mnek-koalia-ho-indonezia-atu-solusiona-kestaun-vistu-ba-estudante/
Jornalista: Nelson de Sousa
Editora: Maria Auxiliadora
