DILI, 17 Novembru 2025 (TATOLI)- Parlamentu Nasionál aprova proposta Orsamentu Jerál Estadu (OJE) tinan fiskál 2026 ba Ministériu Finansa (MF) ho montante $19,887,588 iha faze espesialidade ho votu a-favór 42, kontra 0 no abstensaun 23.
Orsamentu ne’e hodi aloka ba saláriu no vensimentu $9,658, 169, bens no serbisu $9,060, 419, kapitál menór rihun $760, kapitál dezenvolvimentu rihun $409.
Tuir dokumentu livru OJE 2026 MF iha Programa Jestaun Finansa Públika ho subprograma lima hanesan, jestaun patrimóniu Estadu, polítika no jestaun fundu petrolíferu, rekollamentu dadus, kobransa reseita no mobilizasaun finansiamentu, planeamentu orsamentu no polítika ekonomia, ezekusaun orsamentu, jestaun tezoreira, auditória no avaliasaun dezempeñu ho nia atividade 51.
Programa Funsionamentu no Dezenvolvimentu Instituisionál ho sub-programa tolu no atividade 18.
Durante diskusaun espesialidade, deputadu opozisaun FRETILIN aprezenta proposta rua husu halo redusaun orsamentu rihun $400 ba rúbrika profisionál no 149.702 iha rúbrika catering ho sentidu ba ministériu atu hatudu uluk halo poupansa.
Ministra Finansa, Santina Cardoso, la aseita proposta referida tanba verba ne’e hodi asegura nafatin serbisu ministériu nian ne’ebé presta ona hodi mantein nafatin.
Notísia relevante:https://tatoli.tl/2025/11/13/mf-kontinua-prioriza-aumentu-reseita-domestika-iha-oge-2026/
Jornalista: Nelson de Sousa
Editor: Evaristo Soares Martins
