VIKEKE, 17 Novembru 2025 (TATOLI)—Servisu Ministériu Agrikultura Peska, Pekuária no Floresta (SMAPPF) Munisípiu Vikeke, liuhusi Diresaun Veterinária vasina ona asu hamutuk 800 iha Suku Karaubalu, Postu Administrativu Vikeke Vila, Munisípiu Vikeke.
“Ami hahú halo vasinasaun ba ita-nia komunidade nia asu iha semana kotuk. Ami konsege vasina asu hamutuk 800 iha Suku Karaubalu nian. Iha uma-kain balun nian seidauk vasina, maibé kuandu vasina iha suku seluk ramata, ami sei vasina ba uma-kain sira-ne’e,” Xefe Departamentu Veterináriu Munisípiu Vikeke, Domingos do Carmo Pinto ba TATOLI iha Postu Vikeke Vila, Segunda ne’e.
Notísia relevante: Ekipa MAPPF hahú vasina asu ba prevensaun vírus rabies iha Vikeke
Domingos dehan daudaun ne’e ekipa vasinadór kontinua dezloka ba Suku Uma-Ki’ik hodi fó vasina ba komunidade nia asu, durante loron loron lima.
“Ami mós halo ona koordenasaun ho Xefe Suku Uma-Ki’ik hodi koopera ho ekipa vasinadór sira no ekipa ne’e autoridade sira mak sei akompañada. Tuir loloos, ami dezloka ba Postu Lakluta, maibé kestaun tempu nune’e ami seidauk bele bá. Nune’e, semana oin mak ami planu atu bá,” nia informa.
Enkuantu, ekipa vasinadór iha Munisípiu Vikeke hamutuk na’in-20, kompostu husi nasionál na’in-lima (5) no Munisípiu Vikeke hamutuk na’in-15 mak lori programa prevensaun virus raiva.
Jornalista: Vitorino Lopes da Costa
Editór: Xisto Freitas da Piedade
