SMASA Kovalima konsege arrekada reseita $700 ba kofre Estadu
KOVALIMA, 17 Novembru 2025 (TATOLI)- Autoridade Munisípiu (AM) Kovalima liuhusi Servisu Munisipál Agua Saniamentu no Ambiente (SMASA), hahú Janeiru to’o Outubru ne’e kontribui ona reseita $700 ba kofre Estadu.
“Reseita ne’ebé maka ami kontribui liuhusi distribuisaun bee moos ba kliente sira tuir nia tarefa ne’ebé ami kria ona distribuisaun bee la’os loro-loron, maibé depende de’it kliente sira presiza ”, Diretór Servisu munisipál Agua Saneamentu no Ambiente (SMASA) , Angelino Henrique relata ba TATOLI, iha Bairo-Kosta ohin.
Bazeia ba tarefa distribuisaun bee tanke litru rihun 5 ba kliente sira hanesan iha parte postu administrativu Zumalai, Tilomar no Maucatar ho nia folin $25, iha parte kapital munisipiu litru rihun 5 ho nia folin $12.00 no iha suku ho nia folin $15.00.
Daudaun ne’e la halo ona distribuisaun bee tanke litru rihun lima ba kliente sira, tanba laiha kombustivél, nune’e kliente sira husu mós labele sai alende mós labele halo monitorizasaun sistema bee-moos iha postu administrativu hitu.
Prosesu selu ba distribuisaun bee tanke litru rihun 5 mak kliente sira selu ho osan de’it nune’e dirijente iha responsabilidade hodi halo koordenasaun ho Prezidente Autoridade Munisipiu (PAM) Kovalima atu loke konta bankaria, nune’e kliente sira selu direta iha banku.
Tuir dadus funsionáriu ne’ebé daudaun atividade servisu iha Sevisu Munisipál Agua Saniamentu no Ambiente (SMASA) hamutuk 40-resin inklui ho funsionáriu ne’ebe destakadu mai husi nasionál hodi presta sira nia servisu .
Jornalista: Celestina Teles
Editór : Florencio Miranda Ximenes
