DILI, 17 Novembru 2025 (TATOLI)—Universidade Nasionál Timor Lorosa’e (UNTL) propoin ba Ministériu Ensinu Superiór, Siénsia no Kultura (MESSK) liuhusi Komisaun Asesu Ensinu Superior (CAES-sigla portugeza) atu rekruta estudante foun hamutuk 3.828 ba tinan akadémiku 2026.
“Ita hato’o proposta estudante foun tinan akadémiku 2026 nian hamutuk 3.828 ba Ministériu Ensinu Superiór, Siénsia no Kultura, maibé normalmente kada tinan Governu aprova barak liu buat ne’ebé mak UNTL husu,” Reitór UNTL, João Soares Martins dehan ba jornalista sira iha Jináziu Dili, Segunda ne’e.
Nia hatutan, iha tinan 2025 UNTL husu estudante 3.000, ikus Governu aprova rihun 5-resin maibé estudante sira-ne’ebé mai rejistu rihun 3-resin.
“Númeru vaga ne’ebé ita aprova no submete ba MESSK mak ida-ne’e, maíbé komisaun asesu ensinu superiór mak sei halo selesaun ba kandidatu foun. Ita hein rezultadu finál,” reitór tenik.
Entretantu, iha prosesu rekrutamantu, UNTL serviu hamutuk ho MESSK ho Institutu Politékniku Betano (IPB) liuhusi CAES hodi disemina informasaun ba diretór eskola sira.
“Ba prosesu rekrutamentu ita servisu hamutuk ho MESSK, IPB, CAES hodi disemina informasaun ba diretór eskola sira liuliu iha munisípiu sira kona-ba rekrutamentu estudante foun ne’ebé atu asesu ba UNTL,” João Martins informa.
Jornalista: Osória Marques
Editór: Xisto Freitas da Piedade
