Dirijente eskola sira iha Kovalima halo levantamentu ba orsamentu konsensaun eskolár iha BNCTL
KOVALIMA, 18 Novembru 2025 (TATOLI)- Diretora Servisu Munisípiu Edukasaun Kovalima, Elda de Fátima, dehan Eskola sira iha Kovalima halo ona levantamentu orsamentu konsensaun eskolár ba faze daruak ni’an, iha Banku Nasionál Komérsiu Timor-Leste (BNCTL).
“Orsamentu kona-bá konsensaun eskolár ba faze dahuluk eskola sira uza hotu ona no submete ona relatóriu. Tanba ne’e dirijente eskola sira halo ona levantamentu orsamentu konsensaun eskolár ba faze daruak ni’an, ” Diretora Edukasaun Kovalima, Elda de Fátima informa ba jornalista sira iha AMC.
Bazeia ba matadalan orsamentu konsensaun eskolár uza atu hadi’a odamatan eskola sira, janela sira no bele pinta eskola, edukasaun fó ona kompeténsia ba dirijente eskola sira atu utiliza orsamentu konsesaun eskolár, maibé mós matadalan bandu eskola utiliza orsamentu konsensaun eskolár hodi halo konstrusaun.
Orsamentu konsensaun eskolár ba faze daruak ne’ebé orsamentu ba eskola ensinu báziku rihun $143, eskola pre-eskolár $7,572 hein halo prosesu atu foti de’it ona iha BNCTL.
Prosesu konsensaun eskolár ba 2025 ne’e durante fulan-11, tanba prosesu konsensaun eskolár faze ba dahuluk ba fulan-neen ne’ebé maka nia utilizasaun eskola ensinu báziku no eskola pre-eskolár sira submete ona relatóriu utilizasaun orsamentu konsesaun eskolár ba faze dahuluk hamutuk $ 185,765
Ministériu Edukasaun (ME), atribui konsensaun eskolár ba eskola fahe ba kategória hanesan ba eskola pre-eskolár bazeia dekretu lei númeru 84 artigu 7 ne’ebé altera husi dekretu lei númeru 3/2016 kona-bá estatutu administrasaun munisipál no atribui konsesaun eskolár ba ensinu báziku tuir dekretu lei númeru 32/2023 artigu 69 kona-ba gastu orsamentu konsesaun eskolár tuir nesesidade eskola.
Governu atribui konsensaun eskolár fahe ba kategória hanesan konsesaun eskolár ba ensinu pre-eskolár ne’ebé responsabiliza husi munisipál ho nia orsamentu kada estudante $0.75 no konsensaun eskolár ba ensinu báziku reponsabiliza ba Ministériu Edukasaun ho nia orsamentu kada estudante $2.00.
Tuir dadus estudante ensinu pre-eskolár públiku ba tinan 2024 hamutuk 1,604 ne’ebé nia orsamentu ba fulan-neen hamutuk $7,812.00 husi orsamentu inisiál $15,705.00 no alunu ensinu Báziku iha direitu ba konsensaun eskolár husi eskola EBC 20 ho nia filiál 63 hamutuk 14,174 ho totál orsamentu hamutuk $170,088.00
Jornalista: Celestina Teles
Editór : Florencio Miranda Ximenes
