EBF Uaibira-Uatulari menus profesór
VIKEKE, 18 Novembru 2025 (TATOLI)—Koordenadór Ensinu Báziku Filiál (EBF) Uaibira lokalizadu foho Uaibira, Suku Afaloikai, Postu Uatulari, Munisípiu Vikeke, Manuel Menezes Lopes, informa EBF Uaibira kompostu husi primeiru siklu (1o) to’o terseiru siklu (3o) menus profesór.
“Ami sei menus profesór. Profesór ne’ebé daudaun hanorin iha EBF Uaibira ne’e hamutuk na’in-haat de’it hodi hanorin estudante husi primeiru siklu to’o terseiru siklu,” Manuel Menezes Lopes dehan ba TATOLI iha EBF Uaibira, Tersa ne’e.
Koordenadór EBF Uaibira konsidera katak menus profesór sai obstákulu ba prosesu aprendizajen, nune’e profesór sira buka alternativa liuhusi fahe oras atu fahe lisaun ba estudante sira, maibé la sufisiente.
Nia dehan, kona-ba menus profesór, sira hato’o pedidu ona ba Servisu Edukasaun Munisípiu, maibé iha kolokasaun profesór ba eskola sira, EBF Uaibira kontinua la hetan profesór.
“Tanba ne’e, ha’u hakarak sujere ba Ministériu Edukasaun (ME) bainhira halo rekrutamentu ruma ba profesór karik, kolaka mós ba ami-nia eskola tanba ami menus tebes profesór hodi hanorin estudante sira,” nia sujere.
Tuir dadus, estudante EBF Uaibira totál hamutuk 111 kompostu husi primeiru siklu to’o terseiru siklu, totál profesór na’in-haat (4).
Iha fatin ketak, Diretór Servisu Edukasaun Munisípiu Vikeke, Júlio Sakadura rekoñese EBF Uaibira menus profesór no servisu Edukasaun Munisípiu Vikeke esforsu aprezenta ona preokupasaun sira-ne’e ba ME.
“Kona-ba kritériu husi eskola primeiru siklu ne’e, profesór na’in-haat (4), segundu siklu profesór na’in-sia (9) no terseiru siklu profesór na’in-11. Ita agora menus profesór hodi hanorin estudante sira. Problema menus profesór ha’u hato’o ona ba ME, ne’ebé ita hein de’it desizaun husi ministériu,” nia tenik.
Jornalista: Vitorino Lopes da Costa
Editór: Xisto Freitas da Piedade
