DILI, 18 Novembru 2025 (TATOLI)–Ministru Interiór, Francisco da Costa Guterres komprometidu, atu dijitaliza Servisu Migrasaun iha pontu entrada iha fronteira inklui iha Aeroportu tanba Timor-Leste adere ona ba Asosiasaun Nasaun Sudeste Aziátiku (ASEAN).
Ministru Interiór iha Segunda (17/11) konvoka enkontru ho Adidu Migrasaun sira ne’ebé destaka iha Malázia, Indonézia, Austrália, Portugál, Singapura, Filipina no Xina hodi ko’alia kona-ba saida mak Servisu Migrsaun halo ba futuru liga ba emisaun vistu ba estranjeiru.
“La’ós kestaun kona-ba implementasaun devistus, tama ASEAN ne’e ita tenke reorganiza fali hanoin para ita halo tuir sistema ne’ebé mak ASEAN ninian para ita la’o ne’e, la’o ho ida,” Ministru hato’o ba Jornalista sira iha resintu Parlamentu Nasionál Tersa ne’e.
Notísia relevante : Komisaun G husu MNEK ko’alia ho Indonézia atu solusiona kestaun vistu ba estudante
Nia dehan, agora Governu daudaun ne’e hahú dijitaliza ona Aeroportu Internasionál Nicolau Lobato, Komoro hanesan face recognetion no tinan oin sei monta E-GETS, E-ARRIVE E-VIZA.
“Iha buat barak mak sira presiza mellora, primeiru ita tenke dijitaliza sistema. Ita hahú ona tenke halo tan para hotu lalais. Tinan oin ne’e ita tenke halo hotu ona, tanba ne’e mak sira (Adidu Migrasaun) mai para fó hanoin ba ita para saida loos mak ita bele halo para mellora sistema ne’e,” nia katak.
Governante ne’e dehan, Adidu Migrasaun nia serbisu mak atu apoiu serbisu Konsuladu ein termu apoiu asuntu ligadu ho vistu sira, halo emisaun ba vistu temporáriu ba sidadaun estranjeiru sira tama iha territóriu nasionál.
Jornalista : Natalino Costa
Editora : Julia Chatarina
