DILI, 18 Novembru 2025 (TATOLI)–Diretór Administrasaun no Finansa Ministériu Juventude no Desportu (MJDAK), Guido Monteiro, informa hahú husi Janeiru to’o Novembbru 2025 ne’e, MJDAK ezekuta Orsamentu Jerál Estadu (OJE) 2025 atinje ona 84%.
“Orsamentu tinan 2025 ba MJDAK ita ezekuta ona to’o 84%. Ami-nia meta ne’ebé mak iha to’o fulan-Dezembru nia-rohan ne’e tenke atinje 95%,” Guido hateten ba jornalista sira iha edifisiu MJDAK, Lecidere, tersa ne’e.
Nia dehan, OJE 2025 ne’ebé Parlamentu Nasionál aprova ba MJDAK hamutuk $9.472.726 no orsamentu ne’e mak ezekuta to’o ona 84% ne’e.
Husi montante ne’ebé iha fahe ba salariu no vensimentu hamutuk $2.729.571, bens servisu hamutuk $1.850.047, transferénsia públika hamutuk $4.261.650, kapitál menor zero no kapitál dezenvolvimentu hamutuk $631.458.
Entretantu, orsamentu ne’ebé finansia ba kultura no patrimoniu hamutuk $833.172, funsionamentu no dezenvolvimentu institusionál hamutuk $4.431.530 no inkluzaun sosiál hamutuk $4.208. 024.
Jornalista : Hortencio Sanchez
Editór : Cancio Ximenes
