DILI, 18 Novembru 2025 (TATOLI)—Ministru Obra Públika, Samuel Marçal, hafoin simu informasaun kona-ba ponte Turon ne’ebé kotu iha semana kotuk ne’e, Governu sei foti asaun rigorozu ida atu hapara empreza My Friend ne’ebé implementa reabilitasaun ponte iha aldeia Turon, suku Babulu, postu administrativu Same, munisípiu Manufahi.
Ministru Obra Públika, Samuel Marçal, hateten kona-ba ponte turon ne’e agora monu tiha ona, antes ne’e fó kompañia lokál ida mak implementa projetu ne’e, maibé sira halo tinan ida ona mós la hotu.
“Tanba ne’e, ha’u haruka ona tékniku sira reuniaun atu foti desizaun hapara kontratu ba kompañia ida-ne’e hodi troka fali kompañia seluk kontinua halo melloramentu ba ponte Turon,” Ministru ne’e informa iha PN, ohin.
Normalmente Ministru Samuel afirma katak sira sei loke konkursu públiku foun bele mós substitui fali kompañia daruak ne’ebé foin dadauk aplika ba konkursu ida-ne’e.
“Nune’e, daudaun ne’e ita haree hela, karik orsamentu iha tinan 2025 nian iha bele uza osan ne’e, maibé karik laiha ita sei prevee ba alokasaun Orssmentu Jerál Estadu (OJE) 2026 nian,” nia informa.
Aleinde ne’e, ministru ne’e hatutan, kona-ba kompañia internasionál husi Xina ne’ebé halo manipula alkatraun ne’e lalika preokupa tanba sei iha inspesaun husi Ministériu Obra Públika no husi Ajénsia Dezenvolvimentu Nasionál (ADN) inklui mós ho konsultan sira, nune’e bainhira prosesu hirak ne’e kompañia sira halo manipulasaun ba alkatraun mós sei deteta.
“Bainhira ita deteta hetan normalmente ita sei sobu hotu projetu ne’e no hadi’a fila fali, entaun lalika preokupa tanba ha’u sei orienta ekipa ba halo inspesaun,” nia dehan.
Informasaun dehan kauza ne’e akontese husi kompañia no ADN rasik ne’e la loos tanba ADN imposivel atu halo asaun hanesan ne’e, no ema ida la komprende sistema ne’e mak naran ko’alia, loos duni iha kompañia balun gosta manipula maibé iha prosesu inspesaun ne’e sempre deteta.
Jornalista : Alexandra da Costa
Editór : Cancio Ximenes
