Ohin, estudante auzente 97 tuir ezame nasionál segunda xamada
DILI, 18 Novembru 2025 (TATOLI)—Xefe Departamentu Ensinu husi Edukasaun Munisípiu Dili, António Pereira Ximenes hateten ohin parte edukasaun hahú realiza ezame nasionál segunda xamada ba estudante auzente hamutuk 97 husi nivel ensinu báziku, ensinu sekundáriu no ensinu sekundáriu tékniku vokasionál iha Dili.
“Ida-ne’e bazeia ba relatóriu ezame dahuluk ne’ebé ita realiza iha 20 Outubru liubá. Ita simu relatoriu husi eskola sira depoiz ita halo rekapitulasaun,” nia dehan ba jornalista sira iha Ensinu Báziku Sentrál 30 Agostu Komoro, Tersa ne’e.
Nia haktuir hosi estudante 97, kompostu husi ensinu baziku na’in-41, ensinu sekundáriu jerál na’in-51, siénsia sosiál na’in-30, siénsia naturál na’in-21 no ensinu sekundáriu tékniku vokasionál na’in-lima (5).
Notísia relevante: Estudante auzente hamutuk 161 sei tuir ezame segunda xamada
Responsavel ne’e hatutan provavelmente númeru estudante ne’ebé tuir ezame iha saladeaula la to’o iha-ne’eba.
“Embora númeru totál hanesan ne’e, maibé balun mai partisipa kompletu, balun mai apenas disiplina ida de’it no mós balun mai partisipa disiplina rua,” António esplika.
Jornalista: Osória Marques
Editór: Xisto Freitas da Piedade
