DILI, 18 Novembru 2025 (TATOLI)-Parlamentu Nasionál aprova Orsamentu Jerál Estadu 2026 ba Ministériu Obra Públika (MOP) ho montante $237.108.892 iha espesialidade ho votu afavór 42, kontra 0 no abstensaun 23,
“Orsamentu ba Ministériu Administrasaun Estatál pasa,” Prezidente Parlamentu Nasionál Maria Fernanda Lay hateten bainhira ramata votasaun ba orsamentu Ministériu Obra Públika (MOP) nian iha Parlamentu Nasionál, ohin.
Husi totál orsamentu ne’ebé prevee ba MOP ne’e kompostu husi saláriu no vensimentu $7.354.614, bens servisu $17.274.303, transferénsia públika $129.918.321, kapitál menor $5.250.000 no kapitál dezenvolvimentu $77.311.654.
Orsamentu ne’e sei fahe ba programa prioridade neen (6) mak hanesan programa estrada no pontes, dezenvolvimentu rurál no urbana, funsionamentu dezenvolvimentu institusionál, água no saneamentu, eletrisidade no laboratóriu infraestrutura no husi programa hirak ne’e sei iha mós subprogram hamutuk 16.
Durante diskusaun, deputada husi bankada opozisaun PD, Mariano Malik, husu Governu liuhusi Ministériu Obra Públika (MOP) atu tau atensaun ba reabilitasaun estrada urbana sira liuliu iha Ainaru nian, tanba durante tinan barak ona komunidade la asesu no kontinua difikulta komunidade atu la’o ba-mai.
“Ida-ne’e difikulta komunidade atu halo sirkulasaun ekonómia ba sira-nia produtu rasik, enkuantu dalan nafatin aat. Ha’u haree, ita-boot sira lansa uluk ba estrada sira iha rurál, tanba la hadi’a uluk dalan sira iha área urbana nian,” nia hateten iha PN, ohin
Ministru Obras Públika, Samuel Marçal, hateten Governu konstitusionál da-sia iha nia polítika atu mellora fasilidade infraestrutura bázika liuliu hanesan estrada, ponte, bee-moos no eletrisidade ba komunidade iha área rurál no urbana sira.
“Tanba ne’e mak ita lansa projetu barak iha área urbana atu fasilita komunidade nia movimentu. Maibé ita mós labele konklui projetu sira-ne’e iha de’it tinan rua nia laran, tanba programa ne’ebé define iha polítika Governu nia ne’e sei implementa durante tinan lima,” nia dehan.
Aleinde ne’e, iha diskusaun espesialidade proponente husi bankada opozisaun no Governu propoin proposta alterasaun hamutuk lima (5) mak iha proposta númeru 15, 56, ho justifikasaun atu altera alokasaun orsamentu husi MOP nian ba programa husi liña ministeriál seluk, maibé proposta númeru 56 no númeru 15 retira iha prosesu votasaun.
Jornalista : Alexandra da Costa
Editór : Cancio Ximenes
