VIKEKE, 18 Novembru 2025 (TATOLI)—Xefe Aldeia Ainauain, Suku Uma-Ki’ik, Postu Vikeke Vila, Munisípiu Vikeke, Ciquito Pinto informa daudaun ne’e empreza responsavel ba projetu eletrifikasaun ba Suku Uma-Ki’ik hahú hikas hafoin paradu fulan-lima.
“Agora daudaun empreza hahú halo fali ona sira-nia servisu dezde fulan-Setembru nian laran. Obra ne’e paradu kuaze fulan lima, hafoin ami halo tiha konferénsia imprensa mak empreza mai halo fali sira-nia servisu,” Ciquito Pinto ba TATOLI iha Postu Vila, Tersa ne’e.
Ciquito dehan traballadór sira husi empreza responsavel dada ona fiu eletrisidade foin to’o iha parte Beobe, Suku Uma-Ki’ik nian no seidauk to’o iha Aldeia Ainauain.
“Agora daudaun traballadór sira kontinua servisu maibé klíma (udan) ne’e mak sei difikulta traballadór sira halo servisu. Nune’e, ha’u hakarak husu empreza responsavel tenke aselera servisu tanba tempu kontratu liu ona. Populasaun sira durante tinan naruk la asesu ba eletrisidade no sira presiza asesu naroman,” nia hato’o.
Iha fatin ketak, Xefe Suku Uma-Ki’ik, Claudino Amaral haktuir empreza responsavel ba obra eletrifikasaun mobiliza ona ekipamentu (fiu) to’o ona suku hodi dada ba área sira-ne’ebé seidauk asesu eletrisidade.
Projetu eletrifikasaun ne’e lansada iha Fevereiru 2025. Projetu ne’e sei benefísia uma-kain 193 husi aldeia haat hanesan Raihun, Makadean, Maroman no Ainauain. Projetu referidu ho númeru kontratu 004/wk/EDTL, E.P. 2025, ho kustu $247.903,60, ne’ebé responsabiliza husi empreza Uca-Aba Unip, Lda.
Jornalista: Vitorino Lopes da Costa
Editór: Xisto Freitas da Piedade
