DILI, 18 Novembru 2025 (TATOLI)—Ekipa Selesaun Nasionál Futeból Timor-Leste kontinua derrota ho Tazaskistaun 0-5 iha kualifikasaun AFC Asian Cup 2027 faze Grupu A.
Jogu kontinuasaun volta dalimak ne’ebé hala’o iha Estádiu NRL Darwin-Austrália, Tersa ne’e, iha-ne’ebé iha primeira parte Tazaskistaun lidera uluk skor 0-3. Golu rua enxe husi jogadór Shervoni Mabatshoev iha minutu 23 no 44 no Ekhson Pandzhshanbe enxe golu ida iha minutu 25.
Tuir dadus estatístika, ekipa Tazaskistaun sai dominante iha parte dahuluk, hanesan ball positions Timor-Leste iha 35 kompara ho Tazaskistaun 65, shoot on target Timor-Leste ida (1), enkuantu Tazaskistaun haat (4) no Tazaskistaun halo ameasa atake hamutuk 20 kompara ho Timor-Leste ne’ebé atake hamutuk ualu (8) de’it.
Notísia relevante: Zé Pedro lakohi promete bainhira kontra Tazaskistaun
Iha parte daruak, ekipa Lafaek liuhusi treinadór Zé Pedro halo subsitusaun ba jogadór iha área defeza hanesan Junior Filomeno tama no Anizo Correia sai iha minutu 46 ho intensaun atu rezulta golu, maibé la konsege. Infelizmente, Tazaskistaun ne’ebé maioria jogadór altura no utiliza formatu 4:2:3:1 ne’e aumenta tan golu rua liuhosi jogadór Rakhimov iha minutu 82 no Boboev iha minutu 86.
Ho rezultadu jogu entre ekipa rua, Tazaskistaun lidera hikas tabela klasifikasaun ho totál pontu 13, rezultadu husi manán haat (4) no derrota ida (1), tuir kedas Filipina iha pozisaun daruak ho pontu sanulu (10), enkuantu Timor-Leste okupa iha pozisaun datoluk ho pontu tolu (3) no Maldiva iha pozisaun ikus ho pontu 0 hafoin derrota haat (4).
Jornalista: Natalino Belo
Editór: Xisto Freitas da Piedade
