Autoridade Kovalima aprova ona símbolu Munisípiu
KOVALIMA, 19 Novembru 2025 (TATOLI)- Autoridade Munisípiu Kovalima liuhusi reuniaun konsellu Koordenasaun Munisípiu (KKM), kuarta ne’e, realiza reniaun estraordináriu halo diskusaun no aprovasaun ba símbolu munisípiu nian.
Reniaun Konsellu Koordenasaun ne’e lidera husi Sekretáriu Munisípiu Asuntu Administrasaun no Finansa, Alberto Moniz de Araújo inklui membru hamutuk 55, ho nia lema maka “Hamutuk Hanoin Hari’i Futuru Kovalima”.
“Ita vota kondisaun bainhira iha futuru no símbolu iha mundansa bazeia ba rezultadu ne’ebé fó sai husi Prezidente Meza Reuniaun Konsellu Koordenasaun Munisípiu Kovalima ho votu afavor 53, abstensaun rua no kontra zero,” relata Prezidente Konsellu Koordenasaun no Sekretáriu Munisípiu Asuntu Administrasaun no Finansa, Alberto Moniz de Araújo, iha salaun AMC, ohin.
Membru Konsellu Koordenasaun munisipál hamutuk 75 husi númeru iha prosesu diskusaun no halo aprovasaun símbolu munisípiu Kovalima membru konsellu na’in-55 maka partisipa no na’in-20 la partisipa.
“Formatu símbolu munisípiu Kovalima ho nia signifika maka símbolu kabuar hatudu unidade. Kór azul hale’u ita nia hanoin no hakarak ba dezenvolvimentu aas no luan tebes (aas hanesan lalehan no luan hanesan tasi). Kór mean hatudu katak berani hasoru dezafiu oi-oin ba dezenvolvimentu”. nia afirma.
Kova hatudu no reprezenta liurai na’in-lima, kór matak hatudu: “Ita nia rai buras no bokur”, fitun hitu hatudu reprezenta postu administrativu hitu, haree ba kabas hatudu vida ka moris futuru ne’ebé di’ak. Kór mutin iha lema hatudu laran moos ba rai Kovalima, loro-matan haree ba enerjia hodi leno fó naroman hodi fó forsa ba rai Kovalima no mapa ho Kór Coklate hatudu ida-ne’e maka rai Kovalima bokur no nakonu ho mina rai.
Tuir istória ne’ebé hatuur husi Kovalima-oan katak Kovalima etimolojikamente mai husi liafuan tetun terik koba no lima, maibé autoridade portugés temi naran Kovalima to’o ohin loron naran ne’e maka sei eziste.
Koba signifika dadebuk ka fatin hodi look mama (fó malus no bua ) ba malu ka uma na’in look ba bainaka ruma ne’ebé vizita nia uma. Enkuantu Lima refere ba liurai-oan na’in-lima husi reinu Fohorem Nutetuk husi aspetu ukun nain sira ni’an ka autoridade tradisionál sira ni’an.
Koba-Lima reprezenta liurai lima ne’ebé ukun iha área Kovalima maka hanesan,Reinu Fohorem Nutetuk, Reinu Tialai Taroman Fatululik,Reinu Fatumea,Reinu Wehali no Loro Suai enkuantu Reinu Mape Zumalai no reinu Maucatar submete iha reguladu Ai-Assa, Bobonaro.
Jornalista: Celestina Teles
Editór : Florencio Miranda Ximenes
