VIKEKE, 19 Novembru 2025 (TATOLI)—Diretór Peskiza Institutu Nasionál Administrasaun Públika (INAP), Francisco de Araújo informa ekipa INAP observa espasu Diresaun Nasionál Transporte Terrestre (DNTT) Munisípiu Vikeke la sufisiente atu atende kliente sira-ne’ebé trata dokumentu transporte.
“INAP halo ona akordu tékniku ho Diresaun Jerál Telekomunikasaun ho objetivu atu haree kualidade atendimentu públiku ne’ebé mak fornese husi DNTT sira iha munisípiu, liga ba fasilidade, atitude funisionáriu sira-nian ne’ebé fó atendimentu ba klente sira. Maibé, espasu atendimentu mak la adekuadu hodi funsionáriu sira hala’o sira-nia kna’ar,” Francisco de Araújo ba jornalista sira hafoin hala’o pekiza iha edifísiu DNTT Vikeke, Kuarta ne’e.
Francisco hatutan bainhira kliente sira lori sira-nia transporte hodi halo inspesaun, funsionáriu sira uza de’it estrada públika mak halo inspesaun tanba fatin ba inspesaun nian laiha.
“Ida-ne’e afeta ba movimentu transporte sira-ne’ebé halo movimentu iha estrada públika. Nune’e, iha ami-nia peskiza ida-ne’e sai mós rekomendasaun ida hodi aprezenta ba parte kompetente hodi haree situasaun sira-ne’e,” nia subliña.
Francisco informa maski espasu atendimentu limitadu, INAP nota funsionáriu sira husi DNTT Munisípiu Vikeke sira-nia atendimentu ba kliente sira-ne’e la’o ho di’ak.
“Hahú horisehik to’o ohin ne’e ami akompaña funsionáriu DNTT sira hodi fó atendimentu ba ita-nia komunidade. Funsionáriu sira simu sira-nia dokumentu no atende ho laran no servisu ho sentidu pertense. Ita fó apresiasaun ba funsionáriu DNTT Munisípiu Vikeke,” nia hato’o.
Iha fatin hanesan, Diretór DNTT Munisípiu Vikeke, Saul Henrique hateten kona-ba espasu atendimentu kliente ne’e kloot, no preokupasaun ne’e DNTT Munisípiu Vikeke hato’o ona ba nasionál, maibé seidauk fó resposta.
“Ami-nia edifísiu laiha. Daudaun ne’e ami uza provizória edifísiu Servisu Obra Públika Munisípiu Vikeke nian. Durante ne’e ami sempre hato’o beibeik ba nasionál, maibé laiha resposta ba ami-nia difikuldade sira-ne’e,” nia relata.
Daudaun ne’e, funsionáriu DNTT Munisípiu Vikeke hamutuk na’in-sanulu (10) ne’ebé halo atendimentu ba komunidade iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
