DILI, 19 Novembru 2025 (TATOLI)—Klube hamutuk 40, Kuarta ne’e, partisipa enkontru tékniku no dada sorteiu antes kompete faze apuramentu segunda divizaun Liga Futeból Timor-Leste (LFTL).
Prezidente LFTL, Ipolito Soares esplika ho partisipasaun klube 40 hatudu maioria joven iha espíritu desportiva hakarak apoia no partisipa direta iha kampu nune’e hasa’e kualidade kompetisaun no futuru iha jogadór ne’ebé kualifikadu iha selesaun nasionál Timor-Leste.
“Órgaun Liga sente onradu tanba iha klube 40 ne’ebé entusiazmu hola-parte iha apuramentu segunda divizaun,” Prezidente LFTL hateten iha Kaikoli, Dili.
Ipolito relata durante faze apuramentu klube sira sei kompete hodi rezulta klube lima mak iha direitu ba tikete nune’e kompleta tan klube lima seluk ne’ebé atuál iha ona segunda divizaun nune’e époka 2026 klube sanulu mak sei kompete iha segunda divizaun.
Aleinde ne’e, durante faze apuramentu sei aloka orsamentu hamutuk rihun $40 ne’ebé kontribui husi klube 40 ne’ebé sei gastu ba kustu operasionál hanesan manutensaun kampu no paga árbitu.
“Kompetisaun segunda divizaun klube sira tenke kompete tuir regra ne’ebé estabelesidu ona,” Ipolito akresenta.
LFTL rasik tuir planu sei realiza kompetisaun iha 26 Novembru no sei termina iha Janeiru tinan-2026 no sei utiliza kampu haat kompostu kampu Metinaro, Hera, Fatuhada, enkuantu kampu ida hanesan DIT ka Lalenok FC mak sei iha faze konfirmasaun.
Entretantu, klube 40 ne’ebé kompete iha faze apuramentu kompostu ADR União, Mamura, YMCA Komoro, FC Lero, Karai Fuik FC, Relay FC, Kuda Ulun FC, Laisorulai FC, Ad Santo António, Warik Oan FC, São José FC, B2B, Altletico Mota-ain, Sousa United FC, As Kantada, FC Ostiko.
Seluk, Assa FC, Rai-klaran FC, Ablai FC, Filma FC, Ad Bas, FC IRA-pua, Belta 3 FC, As Rai-metin, FC Natura, Akademia Hera, FC Vila Ataúro, Hibers Dili FC, Maudoko FC, Tatamailau FC, Covalima FC, Aimo FC, Fatunsa FC, Unidus FC, Leopa FC, Dark Blue FC, Weasel FC, Mota-Bandeira FC, Saralima FC, Naimeko FC.
Jornalista: Natalino Belo
Editór: Xisto Freitas da Piedade
