DILI, 19 Novembru 2025 (TATOLI)—Ministru Obra Públika, Samuel Marçal, hateten sei orienta ekipa téknika hodi halo levantamentu dadus ba estrada nasionál ne’ebé kotu iha postu administrativu Laleia, munisípiu Manatutu.
“Ha’u seidauk hetan informasaun ida-ne’e. Agradese tebes ba mídia bele hato’o ona mai ha’u, ha’u sei haruka ekipa téknika ba halo observasaun hodi foti dadus,” Ministru Sameul informa ba Agência Tatoli iha PN, ohin.
Governante ne’e hateten, loos duni tanba dalan ne’e estrada nasionál ne’ebé bele fó asesu ba munisípiu tolu mak hanesan munisípiu Baukau, Vikeke no Lospalos,
Kauza husi problema ne’e dalaruma tanba rai halai entaun udan tuun bosok estrada mós naksobu, nune’e sira sei tau atensaun ba problema ida-ne’e hodi resolve.
Bainhira tékniku sira fó ona rezultadu mak nia foin bele halo prosesu konkursu públiku ba kompañia hodi hadi’a, atu estrada ne’e labele naksobu luan liután.
“Ita haree took. Karik fundu iha OJE 2025 sei iha no estrada ne’e ladun gasta osan barak, ita sei uza osan ida-ne’e. Maibé karik laiha, ita sei tau mós planu ba tinan 2026 nian,” nia dehan.
Jornalista : Alexandra da Costa
Editór : Cancio Ximenes
