DILI, 19 Novembru 2025 (TATOLI)—Parlamentu Nasionál aprova proposta Orsamentu Jerál Estadu (OJE) 2026 ba Polísia Nasionál Timor-Leste (PNTL) ho montante $49.511.296 iha espesialidade ho votu afavór 43, kontra 0 no abstensaun 21.
Orsamentu ne’e aloka ba saláriu no vensimentu $43.695.119, bens servisu $5.496.177, transferénsia públika $20.000 no kapitál dezenvolvimentu $300.000.
Tuir livru OJE 2026 haktuir, orsamentu ne’e define iha programa prioridade hamutuk tolu (3) no sub-program hamutuk 12.
Programa prioridade seguransa nasionál ne’ebé sei prevee osan hamutuk $46.241.719, programa funsionamentu dezenvolvimentu institusionál sei prevee $3.234.520 no programa inkluzaun sosiál prevee ho montante hamutuk $35.057.
Iha diskusaun OJE 2026 ba PNTL nian ne’e, laiha proposta husi proponente bankada Governu tantu bankada opozisaun nian no mós laiha pedidu esklaresimentu ruma husi deputadu sira, tanba diretamente kedas ba prosesu votasaun.
Jornalista : Alexandra da Costa
Editór : Cancio Ximenes
