DILI, 19 Novembru 2025 (TATOLI)—Parlamentu Nasionál aprova Orsamentu Jerál Estadu (OJE) 2026 ba Ministériu Defeza ho montante $16.258.818 iha faze espesilidade ho votu afavór 43, kontra zero no abstensaun 22.
Orsamentu ne’e fahe ba salariu no vensimentu hamutuk $3.086.253, bens servisu $12.288.869, transferénsia públika $500.000, kapitál menór 0 (zero), kapitál dezenvolvimentu $383.696.
Tuir livru OJE 2026, MD iha programa 388 kona-ba defeza nasionál ho saláriu no vensimentu hamutuk $1.629.689, bens servisu $11.185.869, transferensia públika 0 (zero), kapitál menór 0 (zero), dezenvolvimentu $383.696 ho totál hamutuk $13.198.654.
Programa kona-ba funsionamentu no dezenvolvimentu institusionál ne’e ho saláriu no vensimentu $1.456.564, bens servisu $1.058.600, transferénsia públika $500.000, kapitál dezenvolvimentu 0 (zero) ho totál hamutuk $3.015.164.
Programa kona-ba inkluzaun sosiál ne’e ho salariu no bensimentu 0 (zero), bens servisu $45.000, transferénsia públika 0 (zero), kapitál menor 0 (zero), kapitál dezenvolvimentu 0 (zero) ho totál hamutuk $45.000.
Iha diskusaun OJE 2026 liliu orsamentu MD nian ne’e, deputada bankada KHUNTO, Olinda Guterres. husu ba Ministériu Defeza (MD) atu utiliza osan ho di’ak hodi haree ba servisu defeza nian.
Deputada KHUNTO ne’e hateten, membru Falintil-Forsa Defeza Timor-Leste (F-FDTL) barak mak farda ka uniforma tuan hotu ona no ida-ne’e presiza sosa fali foun ba sira.
“Osan ne’e favór ida haree ba ita-nia forsa sira, hasa’e ba sira-nia saláriu, suku di’ak sira-nia farda foun atu labele utiliza beibeik farda sira tuan ne’e, ne’e dignidade ita-nia nasaun nian,” Olinda hateten.
Hatan ba preokupasaun ne’e, Ministru Defeza, Kontra Almirante Donanciano do Rosário Gomes ‘Pedro Klamar Fuik’, hateten orsamentu ne’e utiliza ba servisu defeza nian.
“Orsamentu ida-ne’e, atu halo investimentu ba seguransa ita-nia nasaun nian, ami husu deputadu sira-nia apoia. Osan ne’e, ami sei utiliza ba ami sei sosa militár sira-nia farda, botas no nesesidade ba militár sira-nian,” nia dehan.
Jornalista : Hortencio Sanchez
Editór : Cancio Ximenes
