ANAAA kontinua halo avaliasaun ba kursu iha universidade-institutu sira iha TL
DILI, 20 Novembru 2025 (TATOLI)-Ajénsia Nasionál ba Avaliasaun no Akreditasaun Akadémika (ANAAA, sigla pirtugés) sei kontinua implementa servisu iha 2026 hodi halo avaliasaun ba akreditasaun kursu sira iha universidade no institutu ne’ebé eziste iha Timor-Leste atu tuir padraun ne’ebé iha.
Ministru Ensinu Superior Siénsia no Kultura (MESSK), José Honório Jerónimo, hateten papél Ajénsia Nasionál ba Avaliasaun no Akreditasaun Akadémika (ANAAA) ne’e atu garantia katak kursu sira-ne’ebé loke iha universidade ne’e tenke tuir padraun ne’ebé iha.
“ANAAA iha kritéria 10 ba instituisaun sira-ne’ebé mak bainhira hakarak loke sira-nia kursu (aprendizajen) tantu universidade no institute, importante liu mak atu haree kona-ba kurríkulu. Tanba ne’e mak ministériu halo ajustamentu ba padraun kurríkulu nasionál atu universidade no institutu sira bele uza,” Ministru ne’e informa iha PN, ohin.
Prosesu halo avaliasaun ba kursu sira iha universidade no intitutu ne’e la’ós de’it husi profesór nasionál maibé konvida mós profesór internasionálsira atu sai avaliadór, no bainhira deteta kursu sira-ne’ebé la tuir padraun ne’e tenke taka.
“Atu ita bele rasionaliza katak ita-nia universidade no institutu sira laiha kualidade ne’e sala, tanba iha balun kualidade di’ak tebes no estudante ne’ebé sira prodús ne’e balun mós servisu iha ajénsia internasionál interna no mós esterna¸” nia dehan.
Aleinde ne’e, Parlamentu Nasionál mós aprova Orsamentu Jerál Estadu (OJE) ba Ajénsia Nasionál ba Avaliasaun no Akreditasaun Akadémika (ANAAA, sigla pirtugés) ho votu afavór 43, kontra 0 no abstensaun 21.
Orsamentu ne’ebé aloka ba Ajénsia Nasionál ba Avaliasaun no Akreditasaun Akadémika hamutuk $622.310 ne’e aloka ba saláriu no vensimentu $215.591, bens servisu $306.719 no kapitál dezenvolvimentu $100.000.
Iha livru OJE 2026 nian, ANAAA iha programa funsionamentu dezenvolvimentu institusionál $326.343, ensinu superiór hamutuk $294.977, edukasaun formasaun $990 no sub-programa lima (5) ne’e prevee orsamentu hamutuk $622.310.
Jornalista : Alexandra da Costa
Editór : Cancio Ximenes
