Autoridade Kovalima husu jogadór sira kompete jogu hatudu talentu no disiplina
KOVALIMA, 20 Novembru 2025 ( TATOLI)- Reprezentante Prezidente Autoridade Munisípiu Kovalima, Albino Carvalho Lelo, husu ba jogadór sira ne’ebé maka kompete iha jogu kopa futsal Kovalima atu hatudu nia talentu no disiplina.
“Atividade desportu kopa futsal munisípiu Kovalima ne’ebé ho nia tema maka kompete ho amizade, vense ho disiplina signifika ita kompete ho amizade manan ho disiplina”, Reprezentante Autoridade Kovalima, Albino Lelo hato’o iha nia diskursa bainhira abertura joga kopa futsal, iha kampu Santu António PNTL Kovalima, ohin.
Autoridade ne’e mós fó hanoin atu jogadór sira husi klubu 28 ne’ebé atu kompete joga ho disiplina tanba jogadór sira maka iha koñesementu kona-ba téknika, maibé joga tenke hatudu ida-idak nia talentu ho disiplina. Husu mós ba arbitrajen sira halo selesaun ba jogadór sira ho parsiál labele haree ba grupu no família.
Iha fatin hanesan, Prezidente Komisaun Organizadora Kopa Futsal Kovalima, Basílio do Nascimento Tey Seran, esplika realiza atividade desportu kompetisaun kopa futsal Kovalima tanba inisiativa husi joven-sira ho volontáriu.
“Ita hanaran eventu kopa futsal Kovalima, lia-fuan kopa hanesan kompetisaun durante ne’e komisaun organizadora rejista klubu 28 maka tuir kompetisaun iha kopa futsal durante fulan ida hodi selebra loron boot natal no oinsá atu promove jogadór sira,” Basilio dehan
Komisaun organizadora organiza kopa futsal Kovalima tanba hetan kontribuisaun husi klubu 28 ho orsamentu hamutuk $700 alende ne’e suporta husi Zaqjoanas store,guest house Maria Teis ,Boitole Unip Lda, Focadioma no Lila SDV.
Kompetisaun Kopa futsal ne’e klubu 28 maka sei kompete maka hanesan,Fc Halibur,FC Odomau,Minarai FC,FC Frateli Kovalima,FC Arah Angin,FC larende,Fc Busakukun,Novu City FC,Rompe FC,FC Orun,FC Famoi,FC Justisa,Lalaktikos FC,FC Wemon,FC Rebarko JR,FC fohoterin,FC Manai, FC Hasuma, FC Unidos no FC HSN
Entretantu, Diretór Ezekutivu Sentru Juventude Kovalima, Júlio Ferreira,reforsa katak, Prezidente Komisaun Organizadora halo ona esplikasaun realiza eventu ne’e, tanba inisiativa ho voluntáriu mai husi joven sira , hakarak hatudu sira-nia talentu liuhusi kompetisaun jogu kopa futsal.
“Volontáriu hahú husi ita-boot sira ne’ebé ita organiza eventu espesiál hanaran kopa futsal Kovalima entaun presiza atu promove didiak ita-boot sira nia talentu ita esperansa promove jogu futsal ho di’ak liu no mós desportu sira seluk,” nia afirma.
Jornalista: Celestina Teles
Editór : Florencio Miranda Ximenes
