FONGTIL realiza enkontru anuál hodi aprezenta relatóriu anuál
DILI, 20 Novembru 2025 (TATOLI)–Forum Organizasaun Naun Governamentál Timor-Leste (FONGTIL), kinta ne’e, hala’o enkontru anuál ho tema prinsipál “Ho prinsipiu ativizmu, ita asegura boa-governasaun ba dezenvolvimentu nasionál ne’ebé inkluzivu, reziliente no sustentavél” ba membru sira, hodi diskute kona-ba relatóriu anuál no asuntu seluk balun ne’ebé relasaun ho servisu Sosiedade Sivíl nian.
“Enkontru jerál anuál ne’e nia objetivu mak oinsá atu aprezenta kona-ba relatóriu anuál sira-ne’ebé sekretariadu halo atu bele hetan aprovasaun husi asembleia,” Diretór Ezekutivu FONGTIL Valentim da Costa Pinto, hateten ba TATOLI hafoin reuniaun ne’e.
Nia dehan, atividade seluk iha reuniaun ne’e mak atu aprezenta ba membru kandidatu foun sira ne’ebé rejistu ona iha FONGTIL atu bele sai membru ba FONGTIL.
“Atividade seluk mak ita atu aprezenta membru foun sira-ne’ebé durante ne’e mai rejistu ona hakarak sai membru iha FONGTIL. Ita simu sira no sira kumpre ona kriteria sira-ne’ebé ita fó, entaun iha ne’e ita sei diskute no halo aprovasaun, nune’e sira bele sai ona membru permanente iha FONGTIL,” nia dehan.
Entretantu, iha atividade ne’e mós atu haree membru sira-ne’ebé la ativu ona bele elemina husi FONGTIL hanesan membru no lakon estatutu hanesan Organizasaun Naun Governamentál.
“Maibé atu hasai sira tenke liuhusi asembleia no enkontru hanesan ne’e, tanba sira laiha ona programa, sira laiha ona atividade, entaun ita tenke hasai sira,” nia hateten.
Okaziaun ne’e, FONGTIL atu ko’alia mós ho membru sira kona-ba saida mak hamutuk ho membru sira atu halo ba oin relasiona ho tema prinsipál ne’ebé mensiona.
Daudaun ne’e Organizasaun Naun Governamentál ne’ebé hamahan-aan iha FONGTIL nia okos hamutuk 288, maibé sira-ne’ebé sei ativu hodi partisipa iha enkontru referida hamutuk 204, ho nune’e membru 84 la konfirma partisipa iha enkontru ne’e no sei iha desizaun hodi hasai no simu fali membru foun.
“Ita iha membru foun hamutuk hitu (7), ami konklui ona sira-nia prosesu administrasaun no iha enkontru ne’e ita sei aprezenta atu bele hetan premisaun sai hanesan membru ba FONGTIL,” Valentim konklui.
FONGTIL reprezenta Forum Organizasaun Naun Governamentál Timor-Leste nian, organizasaun ida-ne’ebé harii husi ONG sira iha Timor-Leste iha tinan 1998.
Ninia objetivu mak atu halo advokasia no apoiu ba moris di’ak sidadaun timoroan sira-nian, garante sira-nia liberdade husi injustisa no hametin setór ONG, atu nune’e bele ko’alia ba sidadaun sira hotu liuliu grupu vulnerável sira.
Tipu Organizasaun: Organizasaun ida-ne’ebé la’ós lukrutivu, la’ós sektáriu no la’ós partidáriu ne’ebé kompostu husi membru sira hosi ONG lokál, nasionál no internasionál sira.
Foku Atividade sira: FONGTIL partisipa iha atividade oioin inklui diskusaun públiku, komunikasaun ho ajénsia Governu nian hanesan Ministériu Saúde, no halo monitorizasaun ba asuntu sosiál sira hanesan direitu prizioneiru no bem-estar labarik nian.
Misaun: Atu enkoraja partisipasaun komunidade nian iha prosesu foti desizaun polítika no demokrátiku no garante katak sidadaun Timoroan sira hetan oportunidade hanesan atu hetan prosperidade.
Jornalista : Hortencio Sanchez
Editór : Cancio Ximenes
