DILI, 20 Novembru 2025 (TATOLI) – Polísia Nasionál Timor-Leste (PNTL) liuhusi Eskuadra Vera Krús, detein ona suspeitu na’in-hitu ne’ebé suspetadu sona membru Korpu Seguransa Pesoál (CSP, sigla portugés) ida iha Vila Verde, José Lino Arcanjo Tomae.
Ho nune’e, Eskuadra Dom Aleixo iha Kinta, ohin, maizumenus 12:00 meudia halo identifikasaun suspeitu na’in-hitu ne’ebé suspetadu sona membru CSP Ajente Prinsipál José Lino Arcanjo Tomae.
Komandante PNTL Munisípiu Dili, Superintendente Xefe Polísia Orlando Gomes, informa, lori ona suspeitu sira ne’ebé suspetadu envolve iha kazu sona membru PNTL iha área Vila Verde.
“Ohin, ita kontinua buka tuir suspeitu sira ita kaptura ona, iha na’in-hitu ne’e mak agora iha Eskuadra Vera Krús atu halo identifikasaun hotu, depois ita sei buka tán suspeitu sira seluk atu nune’e bele submete ba iha prosesu investigasaun,” Orlando hateten ba jornalista sira iha nia kna’ar fatin, Kaikoli, kinta.
Komandante Orlando relata katak, kazu ne’e akontese iha aldeia Lemorai, suku Vila-Verde, iha grupu balun mak asaltu ba malu, depois konsege membru CSP ida hetan kanek.
Nia informa, iha akontesimentu ne’e tanba iha sidadaun ida realiza festa despedida ida ne’ebé mak nia atu ba Portugál, tanba ne’e nia despedida festa ne’e ba família de’it.
Maibé nia alin ba bolu tán ninian maun-alin sira husi fatin seluk mai hamutuk, entaun depois sira konsumu alkól hodi hamosu konflitu to’o rezulta membru CSP ida kanek.
“Akontesimentu ne’e rezulta ita-nia membru CSP ida hetan kanek iha parte kakorok, ita-nia membru Polísia ne’e agora halo tratamentu iha HNGV,” nia haktuir.
Nia dehan, hafoin akontesimentu ne’e, eskuadra Dom Aleixo no forsa rezerva halo atuasaun kedas hodi neutraliza situasaun ne’ebé mak iha Aldeia Lemorai, Suku Villa-Verde.
Nia informa, agora daudaun membru CSP ne’ebé hetan kanek ne’e evakua kedas ba HNGV hodi halo tratamentu.
“Ita seidauk hatene iha prosesu investigasaun mak hatene uza saida mak to’o ita-nia membru CSP ne’e hetan sona kanek,” nia relata.
Orlando hateten, suspeitu na’in-hitu ne’e polísia halo identifikasaun kuandu investigsaun mak deteta suspeitu sira-ne’e envolve iha kazu ne’e PNTL sei halo detensaun ba suspeitu sira-ne’e ho oras 72.
Notísia relevante: Membru PNTL ida hetan sona iha Vila Verde
Jornalista: Natalino Costa
Editór: Evaristo Soares Martins
