PNTL submete ona kazu sidadaun xineza SD ba Ministériu Públiku
DILI, 20 Novembru 2025 (TATOLI) – Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál submete ona sidadaun Xineza ho inisiál SD nia kazu ba Ministériu Públiku.
Sidadaun Xineza ne’e, envolve krime arma probuidu ne’ebé rejistu ho númeru úniku (NUC): 0313/2025/PNSIK.
Portavós Komandu PNTL, Superintendente Polísia João Belo dos Reis informa, iha loron 18 Novembru 2025, Autoridade servisu Migrasaun trava sidadaun Xineza ne’e, tanba tenta atu halai sai hosi Aeroportu Prezidente Nicolau Lobato, Komoro hodi ba nia rai orijen Xina.
Nia esplika, razaun autoridade servisu migrasaun trava sidadaun Xineza ne’e, tanba iha hela faze rejistu ba kazu krime ne’ebe mak la’o hela.
“Prosesu ba sidadaun xineza ne’ebe mak ita hapara nia movimentu iha aeroportu, ita husu orientasaun ba Ministériu Públiku ita halo detensaun fora de fraglante delitu, tanba nia tentativa atu halai husi krime ne’ebé envolve ona,” Joao Belo haeten ba jornalista sira iha Ministériu Interiór, kinta ne’e.
Nia hatutan, hafoin autoridade seguransa migrasaun trava sidadaun ne’e no Ministériu Públiku orienta kedas ba PNTL hodi halo kedas detensaun oras 72.
“Tan ne’e orsida ka aban ita aprezenta ba iha Tribunál hodi halo primeiru interrogatóriu,” nia informa.
Portavos ne’e haktuir, intensaun sidadaun Xineza ne’e halai sai hosi Timor-Leste, karik ema ruma mak obriga ka intensaun ninian rasik ne’e sei iha prosesu segredu justisa nian.
“Ida-ne’e segredu justisa, ha’u labele ko’alia. Sidadaun ne’e iha-ne’e primeiru identifikasaun hala’o tiha ona no aplika ona TIR (Termu Identidade Rezidénsia) ba-nia, depois nia tentativa atu halai sai husi Timór, tanba ne’e mak ita trava nia viajen,” nia subliña.
Jornalista: Natalino Costa
Editór: Evaristo Soares Martins
