VIKEKE, 20 Novembru 2025 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes, informa PNTL sei asegura selebrasaun loron Proklamasaun Independénsia RDTL ba da-50 (28 Novembru 1975-28 Novembru 2025).
“Ami sei jere rekursu membru PNTL ne’ebé iha hodi asegura másima eventu komemorasaun ne’ebé realiza iha kapitál munisípiu no postu sira,” António Rego ba TATOLI iha ninia kna’ar fatin, Beskem, Vikeke, Kinta ne’e.
Nia esplika forsa rua sei halo servisu konjuta ne’ebé kompostu husi membru PNTL no FALINTIL-Forsa Defeza Timor-Leste (F-FDTL) hodi asegura eventu referidu.
“Ha’u sei orienta mós ita-nia komandante eskuadra sira hodi servisu hamutuk ho ita-nia administradór postu sira no autoridade lokál hodi apoia ba seguransa iha ámbitu serimónia Komemorasaun 28 Novembru,” nia subliña.
Tuir dadus, membru PNTL Munisípiu Vikeke inklui eskuadra postu lima hamutuk na’in-135 ne’ebé daudaun ne’e ativu halo seguransa iha Munisípiu Vikeke.
Prevee rihun $20 ba loron Proklamasaun Independénsia RDTL
Iha parte seluk, Autoridade Munisípiu Vikeke prevee orsmentu hamutuk rihun $20 hodi komemora Loron Proklamasaun Independénsia RDTL.
Prezidente Komisaun Organizadora, Fernando Soares esplika katak husi orsamentu ne’e aloka ba postu hamutuk $7.500 iha-ne’ebé kada postu sei hetan $1.500 no koloka ba komisaun isár bandeira iha munisípiu hamutuk $12.500.
“Daudaun ne’e ita halo hela preparasaun no koordenasun ho parte komisaun nian. Aleinde ne’e, ita mós prepara estudante Eskola Sekundária Kalixa ba serimónia isár bandeira,” Fernando ba TATOLI iha resintu autoridade munisipál.
Fernando relata atividade ba Komemorasaun 28 Novembru mak hanesan limpeza ba fatin públiku, bazaar kalan ne’ebé sei realiza 24 fulan-Novembru, konsertu muzikál, misa agradesimentu no kari ai-funan iha semitériu Kraras.
Nia husu ba populasaun Munisípiu Vikeke katak iha ámbitu Komemorasaun Loron 28 Novembru ne’e uma-kain idak-idak tenke dada bandera nasionál iha uma oin. Aleinde ne’e mós husu komunidade kontribui ba pás no estabilidade.
Jornalista: Vitorino Lopes da Costa
Editór: Xisto Freitas da Piedade
