DILI, 20 Novembru 2025 (TATOLI)—Komisaun Nasionál Aprovizionamentu (CNA, sigla portugés) rejista projetu liuhusi prosesu aprovizionamentu hamutuk 430, ne’ebé kompostu husi 2024 ne’e projetu hamutuk 232 no iha 2025 ne’e projetu hamutuk 198.
Ministru Planeamentu no Investimentu Estratéjiku, Gastão de Sousa, hateten iha 2024 ne’e iha prosesu aprovizionamentu ba projetu 232, entaun ba konkursu públiku hamutuk 54, ba modalidade kuotasaun 40 projetu iha ajusta direta projetu 138 no iha 2025 ne’e rejista konkursu públiku ba projetu 55, kuotasaun projetu 35, ajusta direta projetu 108 ho totál projetu hamutuk 430 projetu.
“Bainhira iha haree kuantidade projetu iha tinan 2024 ho 2025 hamutuk 430 projetu konklui ona 216 projetu ho valór osan $649.460.415. Kona-ba projetu sein kursu hamutuk 84 projetu, signifika ita iha espetativa ida katak bele finaliza to’o fulan-Dezembru tinan ida-ne’e purvolta pakote 30 ho valór $186.062.199,” Governante ne’e informa iha debate OJE 2026 iha faze espesialidade ne’ebé hala’o iha PN, ohin.
Prijetu sira-ne’ebé finaliza to’o fulan oin ne’e signifika valór kontratu to’o Dezembru mak sei bele atinje $835.522.614, nune’e husi estimasaun mai husi donu projetu sira-ne’ebé submete mai ho valór $1.096.911.
Enkuantu, iha debate espesialidade Parlamentu Nasionál mós aprova Orsamentu Jerál Estadu (OJE) ba Komisaun Nasionál Aprovizionamentu (CNA, sigla portugés) montante $1.961.434 iha espesialidade ho votu afavór 42, kontra 0 no abstensaun 22.
Orsamentu ne’e aloka ba saláriu no vensimentu $1.465.420 no bens servisu $496.014, ne’ebé sei fahe mós ba programa prioridade rua (2) no sub-programa rua (2).
Iha livru OJE 2026 nian ne’e. iha programa prioridade funsionamentu no dezenvolvimentu institusionál ne’e prevee $132.447 no programa jestaun finansa públika prevee $1.828.987.
Enkuantu kona-ba sub-programa rua (2) hanesan ezekusaun orsamentál prestasaun konta prevee hamutuk $1.828.987 no sub-program dezenvolvimentu institusionál prevee $132.447.
Jornalista : Alexandra da Costa
Editór : Cancio Ximenes
