Autoridade Kovalima enkoraja feto sira berani kompete iha polítika no ekonomia
KOVALIMA , 21 Novembru 2025 ( TATOLI)- Reprezentante Autoridade Munisípiu Kovalima enkoraja feto Kovalima-oan atu berani kompete iha polítika no ekonomia hodi sai liderasan,maibé presiza mós feto sira promove nia aan tanba desizaun iha ida-idak nia liman.
Serimónia komemorasaun loron Nasionál feto ne’e organiza husi Sekretária Estadu Estadu no Igualdade (SEI), Autoridade Kovalima hamutuk ho Asosiasaun Halibur Feto Kovalima (AHFKL) iha Kovalima.
“Hahú ba oin ita mós tenke partisipa iha atividade oi-oin, hodi hahú promove ita-idak nia aan, labele taka aan maske seidauk domina, maibé feto mós bele lidera ”, Reprezentante Prezidente Autoridade Munisípiu Kovalima, Teresia Pires hato’o iha nia diskursaun iha salaun AMC.
Komemorasaun loron komememora loron nasionál feto Timor-Leste ba dala 49, feto sente orgullu maske komemorasaun monu iha loron 3 Novembru, maibé foin Komemora ,dala ruma mane sira ezije iha loron espesial ba mane.
Ho komemorasaun loron nasionál feto hanesan oportunidade ba feto sira, oinsá feto mós hatudu nia aan katak feto mós bele, tanba oportunidade iha ona ida-idak oinsá maka bele partisipa iha atividade feto sira
Iha sorin seluk, pontu vokál SEI Munisípiu Kovalima, Francisco de Araujo,Komemorasaun Loron Nasionál Feto monu iha loron 3 Novembru, maibé maka komemora ho intensaun atu fó onra ba eroina sira luta fó nia kontribuisaun luta ba ukun rasin aan.
“ Komemorasaun loron feto Nasionál Timor-Leste ne’ebé ohin ita selebra ba dala 49 hodi fó onra ba eroina sira ne’ebé mate iha funu li-liu eroina sira hanesan Maria Tapo ,Rosa Muki Bonaparte ,Maria Goreti no inan feto sira espesiál iha Kovalima ne’ebé fó sira-nia kontribuisaun hodi luta ba ukun rasik aan ”nia dehan
Atividade komemorasaun loron Nasionál feto oinsá sai reflesaun ba jerasaun foun sira atu bele partisipa no komprende di’ak liu, tanba luta ba ukun rasik la’os ema enrega de’it maibé liuhosi sakrifisiu oi-oin.
Selebrasaun loron Nasionál feto ho nia tema “Feto Timor-Leste selebra o nia direitu, igualdade no oportunidade” signifika partisipasaun feto luta ba ukun rasik aan liu ona, daudaun feto ativu fó nia kontribuisaun atu hala’o dezenvolvimentu iha Timor-Leste
Iha serimónia komemorasaun ne’e, SEI konvida oradór na’in-tolu hodi partilla informasaun hanesan, oradór ba dahuluk Prezidente Konsellu Kombatente Libertasaun Munisípiu Kovalima, Osorio Soares “Mausoko” fahe informasaun kona-bá envolvimentu feto luta ba ukun rasik aan.
Oradór ba daruak Diretora Servisu Munisípiu Apoiu Organizasaun Noun Goverbametál no Komunitária Maria de Jesus Perreira fahe informasaun kona-bá istória susesu feto. Oradór ba datoluk koordenadór Alfela fahe informasaun kona-ba papel no asisténsia legál ba feto no labarik feto.
Jornalista: Celestina Teles
Editór : Florencio Miranda Ximenes
