DILI, 21 Novembru 2025 (TATOLI)—Governu Japaun no Programa Ai-han Mundial Nasaun Unida (WFP-sigla ingleza) hamutuk Ministeriu Edukasaun (ME), Sesta ne’e, asina akordu ida atu hametin no apoia $700.000 ba Programa Merenda Eskolár iha tinan 2026.
WFP apoia Ministériu Administrasaun Estatál (MAE) no Ministériu Edukasaun hodi fornese foos tonelada 330 be eskola 350-resin, to’o labarik sira 100.000-resin iha Munisípiu Kovalima, Aileu, Lautein no Dili.
Embaixadór Japaun ba Timor-Leste, Kimura Tetsuya informa apoiu ida-ne’e reflete ba Governu Japaun nia kompromisu ba kestaun saúde no dezenvolvimentu labarik sira-nian iha Timor-Leste.
“Ami espera katak foos ne’e sei fó enerjia ba labarik sira-nia kreximentu saudável no bele hetan susesu iha akadémiku. Tanba ne’e, ami hein katak fornesimentu foos ne’e sei promove kustume han neʼebé saudável no koñesimentu ba labarik sira iha Timor-Leste atu hadi’a sira-nia isin-lolon no kakutak,” nia dehan.
Iha fatin hanesan, Ofisiál WFP iha Timor-Leste, Amin Said hateten importánsia husi kontribuisaun ne’e nia aliñamentu ho prioridade nasionál sira.
“Ami agradese tebes ba apoiu Japaun-nian ba hahán no apoiu ida-ne’e hatán diretamente ba prioridade Governu Timor-Leste nian atu asegura katak labarik idak-idak iha asesu ba hahán nutritivu durante tinan eskola nian, hodi ajuda sira aprende, sai boot, no hetan susesu. WFP servisu hamutuk ho Ministeriu Administrasaun Estatál no Ministeriu Edukasaun hodi kontinua hametin sistema nasionál merenda eskolár,” nia tenik.
Tuir Amin katak hahán eskola nian mak investimentu importante ida iha kapitál umanu Timor-Leste, ajuda hamenus hamlaha, hadi’a nutrisaun no suporta prezensa eskola nian. Apoiu Japaun nian hodi reforsa esforsu nasionál sira atu proteje labarik sira-nia saúde no moris di’ak no hametin reziliénsia sistema hahán eskola nian.
WFP kontinua servisu hamutuk ho Governu Timor-Leste no parseiru dezenvolvimentu sira atu promove seguransa ai-han no nutrisaun, hodi kontribui ba objetivu dezenvolvimentu ba tempu naruk iha nasaun ne’e.
Entretantu, Ministra Edukasaun Dulce de Jesus Soares informa serimónia asinatura ida-ne’e reflete kompromisu unidu ne’ebé atu asegura futuru no avansa bem-estar Timor-Leste nia oan sira. Tanba ne’e, eventu ida-ne’e marka la’ós de’it parseria ida maibé promesa ida atu asegura katak labarik hotu-hotu iha asesu ba hahán nutritivu sira-ne’ebé suporta sira-nia aprendizajen no kreximentu.
“Lori Governu Timor-Leste nia naran hato’o ami-nia agradesimentu profundu ba Governu Japaun ba investimentu estratéjiku ida-ne’e hamutuk $700.000 ba aprovizionamentu foos. Maibé parseria ida-ne’e reprezenta mós vizaun ida atu haburas joven liu 100.000 nia hanoin no hametin fundasaun sira hosi ami-nia programa nasionál alimentasaun eskolár iha 2026, hodi loke dalan ba Timor-Leste ida-ne’ebé saudavel liu, edukadu liu, no prósperu liu,” Ministra Edukasaun, Dulce de Jesus Soares dehan ba jornalista sira iha Otél Timor, Kolmera, Dili, Sesta ne’e.
Nia rekoñese Programa Mundiál Ai-han Nasaun Unida nian ba ninia parseria no dedikasaun ne’ebé kontinua atu hadi’a seguransa ai-han no nutrisaun iha Timor-Leste.
WFP hahú iha tinan 2005 ho programa merenda eskolár no Governu sai na’in ba Merenda Eskolár iha tinan 2011. Hahú hosi ne’ebá, WFP kontinua fó asisténsia hodi hadi’a liután programa ne’e no apoia Timor-Leste atu hatudu mós ninia realizasaun sira ba atór sira seluk.
Jornalista: Osória Marques
Editór: Xisto Freitas da Piedade
