LIKISA, 21 Novembru 2025 (TATOLI)–Institutu São João de Brito (ISJB) Kasait-Likisá, sesta ne’e, lansa website no biblioteka dijitál link; isjb.edu.tl) hodi fasilita estudante no dosente sira bele halo peskiza no asesu informasaun ne’ebé fasíl, lalais no efisiensia.
Reitór ISJB, Pe. Isaías Abílio Caldas, SJ, hateten ida-ne’e esforsu boot ne’ebé eskola hotu iha mundu halo kona-ba dijitalizasaun edukasaun, tanba biblioteka dijitál atu bele ajuda estudante sira iha ne’ebé de’it, bainhira rejistadu iha institutu bele asesu ba livru sira-ne’ebé sira presiza.
“Ami sorte boot tanba Institutu hetan apoiu husi Governu, ho nune’e ami-nia fuan nakonu ho agradesementu ba Governu ida-ne’e liuliu ba Ministériu Ensinu Superiór Siénsia no Kultura liuhusi parte Koordenadora Universitáriu no Instititu Superiór (CUIS, sigla portugés) ne’ebé fó apoiu orsamentu atu ami bele dezenvolve ami-nia Website no biblioteka dijitál ida-ne’e,” Pe. Isaías hateten ba jornalista sira hafoin ramata lansamentu ne’e.
Pe. Isaías dehan, iha tinan 2025, ISJB hetan apoiu orsamentu husi Governu liuhusi Koordenadora Universitáriu no Instititu Superiór (CUIS, sigla portugés) hodi realiza atividade tolu hanesan apoiu ba estudante, Apoiu ba Dosente no atividade transversál ho totál rihun $108.
Husi orsamentu ne’e, ISJB finansia ba Website no biblioteka dijitál hamutuk rihun $6-resin.
“Ami kontente tanba ida-ne’e ami bele kolabora ho empreza timoroan mak dezenvolve ami-nia website no biblioteka dijitál ne’e. Ita hanoin katak ita timoroan ho timoroan mak bele ajuda malu hodi dezenvolve ita-nia edukasaun,” Pe. Isaías dehan.
Entretantu, Website no biblioteka dijitál ne’e dezenvolve husi empreza timoroan ho naran Kalohan Net.
Diretór empreza Kalohan Net, Armindo de Jesus, hato’o agradesementu ba ISJB ne’ebé fó ona konfiansa ba empreza timoran hodi dezenvolve Institutu nia website no biblioteka dijitál referida.
“Ami agradese no orgullu ba ISJB tanba sira bele utiliza ona empreza timoroan hodi dezenvolve sira-nia wbsite no biblioteka dijitál no fornese Wi-Fi gratuita iha aredór ISJB nian,” Armindo hateten.
Daudaun ne’e, ISJB iha fakuldade ida (1) iha área edukasaun ne’ebé fahe ba departamentu haat (4) mak hanesan lian portugés, lian inglés, matématika no siénsia relijiaun.
Espesifikamente ISJB nia objetivu prinsipál atu prepara profesór sira atu hanorin iha ensinu sekundaria.
Jornalista : Hortencio Sanchez
Editór : Cancio Ximenes
