VIKEKE, 21 Novembru 2025 (TATOLI)—Prezidente Komisaun Organizadora ba komemorasaun loron Proklamasaun Independénsia RDTL ba da-50 iha Munisípiu Vikeke, Fernando Soares, informa iha ámbitu komemorasaun proklamasaun independénsia ne’e, Ministériu Agrikultura, Peska, Pekuária no Floresta (MAPPF) sei aprezenta sira-nia rezultadu servisu ba populasaun liuhusi espozisaun.
Nia dehan, kada diresaun husi MAPPF aprezenta sira-nia rezultadu servisu. “Ida-ne’e ami halo ona koordenasaun ho ministériu, ne’ebé ministru no sekretáriu estadu na’in-tolu mak sei destaka mai Munisípiu Vikeke. Nune’e, diresaun sira sei aprezenta sira-nia progresu servisu no dezafiu inklui aprezenta ekipamentu agríkola ba ita-nia populasaun,” Fernando hateten iha Vikeke, Sesta ne’e.
Tuir nia, espozisaun referida komisaun planeia sei halo abertura iha 24 Novembru no parte komisaun sei kontinua halo kordenasaun ho parte hotu ba realizasaun espozisaun.
“Ha’u lori komisaun organizadora nia naran hakarak husu ba populasaun sira atu hola-parte iha espozisaun, nune’e bele rona direta husi ekipa sira-ne’ebé maihusi MAPPF hanesan Peska, Pekuária no Floresta nian,” nia apela.
Lembra fali katak selebrasaun loron Proklamasaun 28 Novembru ba tinan ne’e Autoridade Munisípiu Vikeke aloka orsamentu ba komisaun hamutuk rihun $20. Husi orsamentu ne’e aloka ba postu lima hamutuk $7.500 no kada postu sei hetan $1.500 no koloka ba komisaun isár bandeira iha Munisípiu hamutuk $12.500.
Entretantu, iha 8 Outubru 2025, Governu liuhusi Konsellu Ministru (KM) aprova ona lema ba komemorasaun 28 Novembru ba tinan ne’e mak “Que a celebração destes 50 anos, do passado, nos assegure confiança no presente e esperança no futuro”.
Jornalista: Vitorino Lopes da Costa
Editór : Xisto Freitas da Piedade
