VIKEKE, 21 Novembru 2025 (TATOLI)—Koordenadór Bee Timor-Leste, Empreza Públika (BTL, E.P.) Munisípiu Vikeke, Marito da Costa relata progresu obra konstrusaun ba bee-moos iha Postu Administrativu Ossú konkluidu ona.
“Ita-nia obra melloramentu bee-moos iha Postu Administrativu Ossú daudaun ne’e empreza responsavel konkluidu ona sira-nia obra, maibé sei iha servisu adisionál ne’ebé ita orienta ba empreza responsavel tenke halo mak aumenta kanu distribui hitu ba komunidade ne’ebé hela dook ita atu tau kanu públiku hodi komunidade bele asesu,” Marito da Costa ba TATOLI iha Postu Vikeke Vila, Sesta ne’e.
Koordenadór BTL haktuir, hela servisu adisionál ba kanu distribui unidade hitu ne’e mak daudaun ne’e empreza responsavel sira instala ona, depoiz finaliza tiha adisionál ne’e hafoin planu koordenasaun ho nasionál hodi entrega obra referida.
“Servisu adisionál ne’e ita-nia empreza sei konklui iha Dezembru tinan ne’e. Enkuantu, distribuisaun ba uma-kain sira-ne’ebé hela iha Postu Ossú hamutuk 475, maibé instalasaun bee ba uma-kain sira-ne’e hamutuk 445 mak ita konsege instala, tanba uma-kain balun muda fatin ona, entaun ita labele instala ona,” nia esplika.
Marito hatutan, maski obra ne’e seidauk entrega, maibé hahú fornese bee ba komunidade hodi asesu daudaun mak hein prosesu entrega nian.
“Agora ita hahú fornese bee ba ita-nia komunidade, maibé ita-nia débitu bee ne’ebé mai rekursu bee matan rua mak hanesan bee matan antiga Uaibua nian débitu litru tolu pur-segundu no bee-matan Uaikirona litru rua pur-segundu de’it. Husi bee-matan rua ne’e ita tau hamutuk litru lima pur-segundu. Entaun, ho númeru uma-kain sira-ne’ebé ita iha labele kobre hotu, nune’e ami planu loke bee loron ida ba zona ida no loron ida ba zona seluk nune’e ita-nia populasaun sira bele asesu hotu bee,” nia katak.
Nia esklarese, iha Postu Ossú uma-kain hamutuk 665 daudaun ne’e seidauk asesu bee-moos tanba débitu bee nian la to’o hodi kobre hotu ba uma-kain sira-ne’e.
“Tan ne’e, ami fó ona hanoin ba ita-nia komunidade Ossú hodi buka tan rekursu bee-mata seluk atu reforsa ba bee-matan rua ne’ebé daudaun ne’e ita kanaliza ba komunidade,” nia akresenta.
Alende ne’e, Marito tenik, bainhira obra melloramentu ba Postu Ossú empreza entrega ona ba BTL no BTL sei koloka funsionáriu na’in-tolu (3) hodi halo kontrolu no lee metru kontadór sira hodi fó reseita ba Estadu.
Entretantu, obra melloramentu ba Postu Ossú implementa husi empreza CDFG Unipessoal Lda, iha-ne’ebé konstrui tanke foun tolu, reabilita tanke tolu no dada bee husi bee-matan ba Postu Ossú ho kustu hamutuk $421.903,57.
Jornalista: Vitorino Lopes da Costa
Editór: Xisto Freitas da Piedade
