DILI, 21 Novembru 2025 (TATOLI)—Institutu Nasionál Kombate HIV-SIDA kontinua halo sensibilizasaun ba medida prevensaun hodi kombate moras HIV-SIDA hahú husi munisípiu to’o nivel suku iha territóriu.
Deputadu bankada FRETILIN, Antoninho Bianco, hateten nia parte preokupa kona-ba Institutu Nasionál Kombate HIV-SIDA ninia servisu ne’e atu kombate ka promove.
“Se kombate karik kombate ne’e hira ona tanba uluk ema la koñese HIV, nune’e estratéjia saida maka ita atu kombate, entaun ita tenke komabte duni se lae ita mai promove de’it,” Deputadu nre’e hateten iha iha PN, ohin.
Primeiru-Ministru, Xanana Gusmão, hateten kona-ba HIV-SIDA bainhira ita temi dehan kombate ne’e la’ós moras normál ida, nune’e ita atu kombate ne’e liuhusi prevensaun lahanesan ho moras COVID-19 ne’ebé ninia transmisaun (da’et) la’ós liuhusi iis maibé HIV da’et liuhusi relasaun seksuál.
“Moras ida-ne’e akontese maka’as liuhusi fronteira. Ne’eduni, ita promove husi kampaña, sensibilizasaun, prosesu halo sensibiliza ba munisípiu sira hotu ona, postu-administrativu mak sei hela 86%, iha suku sira hela 42%. Tanba ne’e, ita tenke halo komparasaun liafuan kombate ho promove,” Primeiru-Ministru informa.
Aleinde ne’e, iha debate espesialidade Orsamentu Jerál Estadu (OJE) ba Institutu Nasionál Kombate HIV-SIDA, hetan aprovadu husi Parlamentu Nasionál ho votu afavór 42, kontra 0 no abstensaun 22.
Orsamentu ba Institutu Nasionál Kombate HIV-SIDA ho montante $919.297 ne’e aloka ba saláriu no vensimentu $289.404 no bens servisu $629.89.
Iha livru OJE 2026 nian, Institutu Nasionál Kombate HIV-SIDA iha programa funsionamentu dezenvolvimentu institusionál ne’e prevee $394.047 no inkluzaun sosiál hamutuk $525.250, ho ninia sub-programa rua (2) mak dezenvolvimentu institusionál no promosaun prevensaun no komunikasaun hodi prevee orsamentu hamutuk $919.297.
Jornalista : Alexandra da Costa
Editór : Cancio Ximenes
