VIKEKE, 21 Novembru 2025 (TATOLI)—Prezidente Asosiasaun Feto Munisípiu Vikeke, Luciana Guterres, informa iha 2025 Sekretaria Estadu Igualdade (SEI) fó apoia Fundu Hadulas ba grupu benefisiáriu hamutuk lima (5) iha Munisípiu Vikeke.
“Iha tinan ida-ne’e ita-nia grupu hamutuk lima mak asesu tán fundu husi SEI no fundu ne’e sei liuhusi Asosiasaun Feto Munisípiu Vikeke. Nune’e, horisehik (20/11), ami asina akordu ho SEI no grupu benefisiáriu hamutuk lima ba Fundu Hadulas, ho durasaun tinan rua, depoiz to’o tinan rua grupu sira entrega fali ba ami hodi rai iha asosiasaun hodi apoiu fali ba grupu seluk,” Luciana Guterres dehan ba TATOLI, iha Postu Administrativu Vikeke Vila, Sesta ne’e.
Luciana tenik, kona-ba fundu ne’e foin lalais SEI loke oportunidade ba munisípiu sira hodi submete proposta ba SEI hodi asesu ba fundu.
“Maibé, iha prosesu hatama proposta ba tinan 2025 ne’e grupu sira husi Postu Uatukarbau, Lakluta no Uatulari la hatama proposta. Postu rua ne’ebé hatama proposta mak Postu Ossú no Vikeke Vila, entaun rezultadu avaliasaun ba proposta grupu lima mak pasa hodi asesu ba fundu referidu,” nia haktuir.
Luciana relata, husi Postu Vikeke Vila hamutuk grupu tolu no Postu Ossú grupu hamutuk rua mak asesu ba Fundu Hadulas, kada grupu hetan $1.000 husi fundu ne’e hodi uza ba atividade negósiu.
Iha parte seluk, Xefe Departamentu Empoderamentu Ekonomia Feto husi SEI, Romão Piedade, haktuir grupu benefisiáriu ne’ebé pasa iha selesaun to’o ona presesu asina akordu, husu atu halo negósiu ho di’ak hodi bele hasa’e rendimentu ekonomia família.
“Espetativa SEI nian oinsá hakbiit ekonomia feto, tanba ne’e grupu lima ne’ebé pasa selesaun aproveita halo negósiu ho di’ak nune’e bele redús dependénsia ekonomia ho parseiru sira, hasa’e rendimentu ekonomia no mós bele apoiu ona nesesidade ekonomia família,” nia enkoraja.
Nia hatutan, husi Postu Vikeke Vila hamutuk grupu tolu no Postu Ossú grupu hamutuk rua mak asesu ba Fundu Hadulas.
Iha fatin hanesan, Sekretáriu Asuntu Sosiál no Organizasaun Komunitária Munisípiu Vikeke, Acacio de Sousa husu ba autoridade postu no suku sira atu apoiu grupu feto benesiáriu sira hodi hala’o atividade negósiu.
“To’o tempu ne’ebé determina tenke entrega fundu ba Asosiasaun Feto Vikeke bazeia ba akordu no labele utiliza fali osan ne’e ba nesesidade seluk. Tan ne’e, ha’u husu ba koordenadora ho membru sira atu servisu hamutuk no autoridade postu no suku sira fó asisténsia ba ita-nia inan-feton sira katak osan ne’e uza duni ba atividade negósiu no tenke iha transparénsia iha gupu laran hodi dezenvolve ekonomia família,” nia fó-hanoin.
Entretantu, grupu feto benefisiáriu ba Fundu Hadulas no grupu vulnerevel hahú husi tinan 2019-2025 iha Munisípiu Vikeke hamutuk 46. Hosi númeru ne’e, grupu balun asesu ba Fundu Hadulas katak to’o tinan rua entrega fali fundu ne’e ba Asosiasaun Feto Munisípiu Vikeke hodi hein fali proposta foun sira. Enkuantu, iha grupu balun la’ós hetan Fundu Hadulas, maibé fundu ne’e ba família vulneravel sira hodi uza ba haforsa sira-nia ekonomia família.
Jornalista: Vitorino Lopes da Costa
Editór: Xisto Freitas da Piedade
