OEKUSI, 21 Novembru 2025 (TATOLI) – Durante fulan 11, hahú husi Janeiru mai to’o Novembru 2025, Sentru Saúde Kiomaonteko iha sub-rejiaun Pante Makasar Rejiaun Administrativa Espesiál Oekusi Ambeno (RAEOA), rejista pasiente ho kazu ba moras Tuberlkuloze (TBC) hamutuk na’in-79.
“Moras infesaun króniku hanesan Tuberkuloze iha períodu fulan 10 hahú Janeiru to’o Novembru, ita rejista ona 79, kazu sira-ne’e deteta husi forma hotu, detesaun husi tipu rua, detesaun liuhusi mikroskope ka PCR nian hamutuk 24, ba iha farmasia diagnóstiku klínika hamutuk 55,” Xefe Interinu Sentru Saúde Kiomaonteko, António Firdaus Dos Santos Neno, dehan iha Oekusi, ohin.
Na’in-hitu lakon vida
Tan ne’e, daudaun ne’e responsavel programa ba moras Tuberkuloza sira, kontinua presta sira-nia papél no sira-nia kna’ar hodi fó asisténsia tratamentu ba pasiente sira.
Notísia relevante:Janeiru-Setembru: MS rejista kazu TB iha Timor-Leste hamutuk 4.080
Médiku Jerál ne’e esplika katak, kazu prinsipál TBC ne’e, mai hosi kutun ida naran mikro-bakteria Tuberkuloze, ne’ebé ho nia korrentr transmisaun ne’e hada’et liuhusi anin, me’ar ka fani, tanba ne’e mak parte saúde sempre hala’o promosaun ho konsiénsializa ba komunidade sira, katak bainhira me’ar liu semana rua ba leten, presiza hakbesik ba fasilidade saúde sira hodi hetan detesaun sedu ba moras TBC ne’e, nune’e bele trava nia transmisaun atu hada’et tutan ba ema seluk ne’ebé hela besik.
“Kazu TBC ne’e nia fatór impaktu ne’e barak liu tanba fatór sosiál, hela fatin, fumadór no nutrisaun tanba ema-neʼebé hetan nutrisaun nia risku aas liu atu hetan tuberkuloze no ema neʼebé fumadór nia risku aas atu hetan moras ne’e,” nia esplika.
Tuir nia, iha 2024 moras tuberkuloze neʼebé Servisu Saúde Rejionál Oekusi rejista ho totál 102, husi númeru ne’e na’in-hitu lakon vida maske hetan tratamentu maibé lakonsege salva, tanba grave ona.
Notísia relevante:Servisu Saúde Oé-Cusse rejista pasiente TBC 102 no hitu lakon vida
Jornalista: Abílio Elo Nini
Editór: Rafael Ximenes de A. Belo
